Мамадышта реконструкциядән соң стадион-ипподромны тантаналы рәвештә ачтылар
0
126
(Казан, 6 сентябрь, «Татар-информ»). Мамадышта күптән көтелгән яңартылган стадион-ипподром ачылды. Объект «Торак һәм шәһәр мохите» илкүләм проекты кысаларында кече шәһәрләрдә һәм тарихи җирлекләрдә уңайлы шәһәр тирәлеген булдыру буенча иң яхшы проектларның бөтенроссия конкурсының грант акчасына реконструкция ясалганнан соң икенче тормыш алды. Бу хакта «Нократ» газетасы яза.
Ачылу тантанасы ТР Дәүләт Советы Рәисе Фәрит Мөхәммәтшин һәм Мамадыш районы башлыгы Анатолий Иванов катнашында узды.
Рәсми өлеш башланганчы Фәрит Мөхәммәтшин район спортчылары белән очрашты һәм мәктәп укучылары арасында биатлон буенча ярышларны ачты. Ул барлык катнашучыларга да җиңүләр теләде. Аннары мөхтәрәм кунаклар туган якны өйрәнү музее экспозициясендә булды, анда аларга соңгы гасырдагы туйларның эволюциясе турында сөйләделәр.
Яңа өйләнешүчеләр парадында күптән түгел генә никахларын теркәгән сигез пар катнашты. Фәрит Мөхәммәтшинга һәм Анатолий Ивановка гаилә мәсьәләләрендә аларның квалификацияләрен раслый торган гаилә хокуклары бүләк иттеләр. Фәрит Мөхәммәтшин тормыш иптәше Фәридә белән 50 ел бергә гомер кичерә, Анатолий һәм Маргарита Ивановлар 35 ел бергә.
Мәгариф өлкәсе вәкилләре «Чәчәк патшалары» тамашасында тере чәчәкләрдән ясалган костюмнарда үзләренең балалар бакчаларын һәм мәктәпләрен тәкъдим иттеләр.
Быел Мамадыш «Торак һәм шәһәр мохите» илкүләм проекты кысаларында кече шәһәрләрдә һәм тарихи җирлекләрдә уңайлы шәһәр тирәлеген булдыру буенча иң яхшы проектларның бөтенроссия конкурсында янә җиңү яулады. Бу юлы грант акчасына Нократ яр буен Ушма елгасы тамагыннан алып спирт заводына кадәр реконструкцияләүне дәвам итәләр.