Ике мөслимә – артистларны ашатучы кейтеринг остасы белән «Ут хатын» арасында низаг чыккан
Ике мөслимә, «Ут хатын» буларак танылган блогер Гүзәл Хөснетдинова һәм Татарстандагы танылган кейтеринг остасы Айгөл Усманова арасында ызгыш чыккан. Гүзәл Хөснетдинова бу темага тулы бер пост багышлаган. Дөрес, алар арасыннан «кара мәче узу»ның сәбәпләре бик үк аңлашылып бетми. Блогер барысын да тәфсилләп сторисларында сөйләгән булган, ә ул сторислар югалган инде. Постта язылганнарга караганда, Айгөл Усманова Гүзәл һәм аның әнисе (элек мәрхүм сеңлесе Лилия) шөгыльләнә торган «Хузур» кейтеринг хезмәтен яманлап сөйләгәнгә охшап тора.
«Бу постны язгач, миңа ташланучылар күп булыр. Ләкин мин дәшмичә торып ардым һәм үз сүземне әйтәсем килә. Мин хейттан курыкмыйм, аңлыйсыздыр, шуңа да сез әлеге постны укыйсыз. Алдан ук әйтеп куям – беркемне дә үпкәләтәсем килми.
Айгөл Усманова турында сүз башланган икән, мин дәшми тора алмыйм. Мин бу кеше белән шәхсән таныш түгел. Беркайчан да күрешкәнебез һәм аралашканыбыз булмады. Бу постны аңа җибәрерләр, һәм ул бу сүзләрне укыр, дип уйлыйм. Һәм бу – бик яхшы булачак.
Минем Айгөлгә соравым бар. Кадерле Айгөл! Син безне ачыктан-ачык күралмаслык итеп, без, әнием белән, сиңа нинди начарлык эшләдек? Усманованың «Хузур гына түгел», «нигә сез Хузурда заказ ясыйсыз, ә миндә түгел?» дип хатлар һәм тавышлы смслар җибәргән очраклары булды. Сез безне көндәшләр дип санасагыз да, без алай санамыйбыз.
Башта Лилия белән тавышландыгыз, аннан соң әни белән. Мин аңламыйм, без сезгә нәрсә эшләдек соң? Икенчедән, күп кенә аңлашылмаучанлыклар дәшмичә, сүзләрне эчтә йөрткәнгә килеп чыга. Кемдер эченә йотып кала. Колак читеннән үткәрә. Ни өчен? Без бит зур кешеләр. Нигә без сүзләр белән аңлаша алмыйбыз?
Кадерле Айгөл, сезнең безгә карата дәгъваларыгыз бар икән, без диалогка, хәтта очрашуга әзер. Без – мөселман хатын-кызлары, әлһәмдүлилләһ, һәм исламны бары тик яхшы яктан гына күрсәтергә тиешбез. Бу пост адресатына барып җитәр, һәм без мондый мөнәсәбәтнең сәбәпләрен ачыкларбыз дип ышанам», – дип язган блогер.
Блогерның бу посты янында тулы бәхәсләр купкан. Айгөл Усманованың хезмәтләреннән кәнәгать булмаган кешеләр дә бик күп табылган. Усманованың кейтеринг хезмәте иң яхшылардан дип тәкрарлаучылар, хейтлар остасы Гүзәл Хөснетдинова, шул рәвешле, үзенә чираттагы пиар уйлап тапкан, дип язучылар да бар.
Ә Айгөлнең исә бу көннәрдә бизнесында бик авыр чоры икән. Аның Казандагы цехында электр энергиясен сүндерүләре сәбәпле, бик күп клиентлары үз заказларын вакытында ала алмаган. Айгөл Усманова да Гүзәл Хөснетдинованы, шушы моменттан файдаланып, хейт тотуда гаепли.
«Казандагы цехта электр энергиясен сүндерделәр, шул сәбәпле, без бик күп клиентларыбызга заказларын әзерләп һәм илтеп җитешмәдек.
Кызганычка, без үз эшебездә кеше факторына берничек тә йогынты ясый алмыйбыз. Барлык килентларыбыз белән дә элемтәдә торабыз, компенсация түләү буенча да эш алып барыла. Без барыгызның да ышанычын кире кайтарырбыз, иншәаллаһ. Инде хәзер үк сервисны яхшырту буенча эшләр башланды.
Без сан артыннан кумыйбыз. Барысы да кешеләрдән – пешекче, илтеп бирүчеләр, менеджер, администратор, офис хезмәткәрләреннән тора. Кешеләр сезнең өчен әзерли һәм илтеп бирә. Ышанычыгызны акламавыбыз бик кызганыч, әмма без сөйләшүләргә әзер.
Үзем һәм командам адресына бик күп тискәрү сүзләр укыдым. Сүгенү дә, әшәке сүзләр дә бар иде. Авыр вакытларда кемнең кем икәнлеген аңлыйсың. Эмоцияләре беткәч, бу кешеләр үзләрен минем урынга куеп карарлар һәм бизнес оештыручы мондый вакытта үзен ничек хис иткәнне аңларлар. Миңа бик авыр. Һәр соңга калган заказны үзем аша үткәрәм. Кешеләрнең нинди читен хәлдә калдыруыбызны аңлыйм, барыгыздан да гафу үтенәм.
Компания эчендә бу ситуацияне төзәтү буенча зур эшләр көтелә, тик болар барысы да – өзелгән чаралар, бәйрәмнәр бәрабәренә. Барыбызга да килеп чыккан хәлләрне түземлек белән үткәрергә иде…
Ә миңа, бу авыр минутларымда миңа терәк булыр урынына, әлеге темага хайп тотучыларның сторисларын җибәрәләр. Алар шул ук пешекчеләр, илтеп бирүчеләрнең үз әниләре, апалары булу мөмкин икәнлеген уйлап та карамыйлар. Илтеп бирүчеләргә нинди генә сүзләр ишетергә туры килмәде…
Ә Гүзәл миңа тулы бер пост багышлаган. Мөслимәнең мөслимәгә шул рәвешле «терәк булуы» ничегрәк сезгә? Мине белүчеләр, бу пост астында үз фикерләрегезне калдырсагыз иде.Чөнки анда мине көнче хатын-кыз буларак тасвирлыйлар...» – дип язган Айгөл сторисларында.
Айгөл Усманова – Татарстан һәм Башкортстан артистларының концертларына табын кору белән дә шөгыльләнә. Аны күпчелек җырчылар рекламалый.