Журтташтар: шайлоодо Италиядагы жарандар активдүү

Парламенттик шайлоого чет жактагы бир жарым миллиондой мекендештердин 84 миңдейи добуш берүү үчүн каттоодон өтүп, биометрикалык маалыматтарын тапшырган. Бул жолу жаңы добушканалар АКШнын Чикаго, Нью-Йорк, Италиянын Рим, Кальяри жана Түркиянын Анталия, Орусиянын бир катар шаарларында ачылды. Түштүк Кореяда добуш берүү жыйынтыкталды Түштүк Кореяда добуш берүү жыйынтыкталды. Быйыл Сеулдагы консулдуктагы каттоодон 1651 кыргызстандык өтүп, биометрикалык маалыматын тапшырган. Ал жактагы шайлоо комиссиясынын төрагасы Эмил Калиловдун айтымында, каттоодон өткөндөрдүн 10% гана добуш беришти. "Добуш берүү бекетин жаптык. Шайлоо жакшы маанайда өттү. Тилекке каршы, жарандарыбыздын көпчүлүгү келе алышкан жок. 144 жаран добуш берди. Бул эми коронавирус чектөөлөрүнө дагы байланыштуу болушу мүмкүн. Ошондой эле жарандарыбыздын көбү башка шаарларда завод-фабрикаларда иштешет. Алыстыктан улам алар келе албай калышты окшойт". Добуш берүү Орусиянын Ыраакы Чыгышында дагы жыйынтыкталды. Быйыл Хабаровск шаарында алгачкы жолу добуш берүү бекети ачылган. Консулдуктагы каттоодон 250дөй жаран өткөн. "Катталган жарандардын 45% өз тандоосун жасашты. Ушундай мүмкүнчүлүк түзүлгөнүнө Хабаровск шаарындагы кыргызстандыктар абдан эле кубанышты. Анткени буга чейин бизден 800 чакырым алыстыктагы Владивосток шаарына барып добуш берүүгө аргасыз болушчу. Ал жакка барууга көбүнүн мүмкүнчүлүгү да жок эле",-деди шайлоо бекетинин төрагасы Алтын Мырзабаев "Азаттыкка". Чет жактагы журтташтар алдыдагы парламент кандай болушун, кандай депутаттар келишин каалашат? Бул сурамжылоодон көрүңүз:   Италиянын Сардиния аралында активдүүлүк жогору Европа мамлекеттериндеги добушканалар жергиликтүү убакыт боюнча эрте менен саат сегизде ачылды. Быйыл Италияда жашаган журтташтарыбыз бир эмес, эки шаарда добуш берүү укугуна ээ болушту. Шайлоо бекеттери Кыргызстандын Римдеги элчилигинде жана Сардиния аралынын борбору Кальяри шаарында ачылды. Кальяриде ар кандай маалымат боюнча эки миңдей кыргызстандык бар. Алардын бири Миргүл Өмүралиева шайлоого жарандар активдүү катышып жатканын байкаган. "Өзүм добуш берүү үчүн бир сааттай кезекке турдум окшойт. Анткени, бул жерде бир чети пандемия эрежелеринен улам, добушкананын ичинде көп адам топтолууга болбойт. Экинчиден, шайлоого келгендер абдан көп. Жумуштан суранып келгендер бар экен, аларды биринчи кое бердик. Кээ бирөөлөр өзүлөрү баккан чал-кемпирди кошо жетелеп келишиптир. Арал аябай чоң болгондуктан, айрымдары поезд, такси, автобус менен атайын келип жатышат. Активдүүлүк жакшы. Менимче жүздөй киши түшкө чейин эле добуш берип койду. Дагы кечке чейин көп эле келишсе керек". Ошондой эле Кыргызстандын Рим шаарындагы элчилиги расмий ачылганы кыргызстандыктар алгачкы ирет добуш берип жатышат. Ал жактагы шайлоо комиссиясынын төрайымы Назгүл Төлөбаеванын айтымында, түшкө чейин жыйырма чакты гана адам өз тандоосун жасаган. Германияда коронавирустун жайылуусу күч алгандыктан, чектөөлөр катаалдашкан. Мындан улам жарандардын катышуусу аз болуп калабы деген кооптонуу бар экенин Кыргызстандын Германиядагы элчилигинин Бонн шаарындагы бөлүмүнүн башчысы Чынара Токталиева билдирди.  Парламенттик шайлоого карата чет мамлекеттерде 59 добушкана ачылган. Борбордук шайлоо комиссиясынын (БШК) 18:00дөгү маалыматына караганда, 84 128 шайлоочунун 6 609у же 7,86% добуш берди. Добушканалардын көпчүлүгү Орусиянын аймагында жайгашкан.  Буга чейин Түштүк Сахалин, Владивосток, Иркутск аймактарында жана Жапониядагы шайлоо участокторунда добуш берүү аяктаганы кабарланган.  28-ноябрда өтүп жаткан парламенттик шайлоодо 21 партиядан 1004 талапкер ат салышууда. Алардын 54тү депутат болуп келет. Ал эми бир мандаттуу округдардан катышып жаткан 282 талапкердин 36сына мандат берилет. Жалпысынан Жогорку Кеңешке 90 депутат шайланат.