Фирдүс Тямаев Азат Фазлыевны дөрес җырларга өйрәтә башлаган
Татар эстрадасы тамашачысын сәхнәдән биетүче Фирдүс Тямаев үзенең бай тәҗрибәсе белән бүлешә башлаган. Ул үзенә «укучы» итеп Азат Фазлыевны сайлаган. Сәхнәгә тормыш иптәше Алсу белән күтәрелгән Азат соңгы арада үзенең сольный карьерасын төзергә хыяллануы турында әйтә башлаган иде. Ләкин бу җырларын да җырчы пар бергә һәм остаз күзәтчелеге астында яздырырга булган.
Видеодан күренгәнчә, Фирдүс Тямаев, Лениногорск музыка-сәнгать педагогика көллиятендә алган музыкаль белеме һәм үз тәҗрибәсенә таянып, остазлык эшен бик тә актив башкара. Азат Фазлыевның һәр авазын игътибар белән тыңлый, йодрыкларын йомарлап, Азатның авызын кирәк вакытта яба. «Менә монысы классно», – дип тә мактап җибәрә ул укучысын.
Бу күренешне видеога Алсу Фазлыева төшереп торган. «Яңа җыр яздырдык, тиздән ишетерсез дуслар», – дип игълан итте ул яңа иҗат җимешен. Бу җырларына арнжировканы Марат Мухин эшләгән.
«Мескен Тямай. Беркатлы инде бигрәк», – дип жәлләгән аны журналист Гөлгенә Шиһапова, видеоны күргәч. «Дөрес җырлагыз», – дип, җырчыларның «салпы ягына салам да кыстырган» Мухин.