Тохӆаң хопан манты юш нэпек ӆутты рахаӆ
Яӆпа ёхатты ӆуң па сус хатӆатан щутщаты, мосаң па вер сахат яңхты юш нэпекат ин ӆутты рахаӆ. Щимащ айкеӆ «Ямал» авиакомпания хоща ястаса. Туңмаӆтам расписание хуват няӆъяң пеӆа вет субсидированной па хут коммерческой тохӆаң хоп яңхты питаӆ.
Тохӆаң хопат яңхты яӆпа верам программа ай кер тыӆащ няӆъяң пеӆа оӆаңмет хатӆ эӆты ай тахайт потты тыӆащ хольмаң пеӆа хутмет хатӆ унты рупитты питаӆ.
Хошам муват пеӆа яңхты юшӆаӆ Пулңават, Новый Уренгой, Надым па Ноябрьск вошат эӆты ӆуң сыс кат пуш ара верӆайт. Щиты Пулңават эӆты Сочи воша ӆапат няӆ пуш, Новый Уренгой эӆты хуӆам пуш, Ноябрьск па Надым вошңан эӆты кат пуш тохӆаң хоп яңхты питаӆ.
Минеральные Воды па Горно-Алтайск пеӆа туняӆ яӆап юшат пуншсайт. Там таӆ-ӆуң щи юшат хуват тохӆаң хопат па эсаӆӆайт.
Салехард-Уфа тохӆаң хоп ин ӆапат йи пуш яңхаӆ. Ӆуң сыс, Ас нопатты тыӆащ ӆапатмет хатӆ эӆты щёхар тыӆащ хольмаң пеӆа няӆмет хатӆ унты хоӆна йи рейсан нётӆа па ӆапат кат пуш яңхты питаӆ.
Хоятат тохӆаң хопа юш нэпек ӆуттэӆ порайн тынаӆ ара ант хойты ураңан, иса ӆатыӆыты юшат хуват юш нэпек тынӆаӆ хув тэӆан округ охатан нётман тайӆайт. Ар няврэм тайты хоттэӆат — йи няврэма ӆутты юш нэпекаӆ кат щёрас ветсот соӆкувая хойӆ.
Юш нэпекат «Ямал» авиакомпания кассайн па официальной сайтан ӆутты рахаӆ.
Зоя Куртямова ханшам потар