Мамадыш районында яңа фельдшер-акушерлык пункты ачылды
0
264
(Казан, 12 гыйнвар, «Татар-информ»). Мамадыш муниципаль районының Омар авылында яңа модульле фельдшер-акушерлык пункты ачылды. ФАП «Сәламәтлек» илкүләм проекты кысаларында төзелде. ФАП эше белән Мамадыш муниципаль районы башлыгы Анатолий Иванов, «Омара» агрофирмасы ҖЧҖ генераль директоры Тәлгать Абдуллин һәм Мамадыш үзәк район хастаханәсе баш табибы Дамир Хаҗиев танышты. Бу турыда Татарстан Сәламәтлек саклау министрлыгы матбугат хезмәте хәбәр итә. Омар ФАПы Омар, Вандовка, Омар Починок, Березовска, Покровское авылларында яшәүче халыкка хезмәт күрсәтә. Халык саны — 375 кеше (194 йорт). Хезмәт күрсәтү радиусы 12,5 км, үзәк хастаханәгә кадәр — 44,5 км. Антонина Жаркова, Роза Пичугина, Раиса Останина, Людмила Назарова, Мария Гетманская, Мария Тимушенкова, Раиса Мастрикова, Анастасия Хәсәнова, Александра Булашованың күпьеллык хезмәтләре өчен Үзәк район хастаханәсе һәм район башлыгының Рәхмәт хатлары белән бүләкләнде. Халык исеменнән пенсионер Нина Михайловна республика җитәкчелегенә, сәламәтлек саклау министрлыгына һәм әлеге проектны тормышка ашыруда актив катнашучыларга рәхмәт сүзләрен әйтеп, ФАП авыл халкы өчен зур бүләк булуын әйтте. Кунаклар һәм халык пациентларны кабул итү кабинетын, процедура кабинетын, дару препаратларын саклау кабинетын, медперсонал бүлмәләрен, хуҗалык блогын карады. Яңа модульле фельдшер-акушерлык пункты барлык стандартларга һәм санитар нормаларга җавап бирә, электр җылытуы, кайнар һәм салкын су, пандус бар. Халыкка сыйфатлы беренчел медик-санитар ярдәм күрсәтү өчен барлык шартлар да тудырылган. ФАП кирәкле медицина техникасы белән җиһазландырылган.