Педагогсене хавхалантарĕç
<p>Чăваш Енре пĕчĕк хулара тата ялта ĕçлеме вырнаçнă çамрăк педагогсене укçан тӳлесе пулăшĕç. Кун пирки калакан хушăва Чăваш Республикин Пуçлăхĕ Олег Николаев алă пуснă.</p>
<p><strong> </strong>Вĕренӳ организацийĕсенче педагогсене укçан хавхалантармалли документ 2023-мĕш çулхи кăрлач уйăхĕн 1-мĕшĕнче вăя кĕрет.</p>
<p>Çамрăк специалистсен вĕрентӳ организаципе килĕшӳ çирĕплетмелле. Ялта пĕрремĕш çул ĕçленĕшĕн вĕрентекенсене 20 пин тенкĕ, иккĕмĕш çулшăн — 40 пин тенкĕ, виççĕмĕш çул вăй хунăшăн 60 пин тенкĕ тӳлĕç.</p>
<p>50 пин çынна яхăн пурăнакан хулара пĕрремĕш çул ĕçлекен педагога 10 пин тенкĕ, иккĕмĕш çул тăрăшакана 20 пин тенкĕ, виççĕмĕш çул вăй хуракана 30 пин тенкĕ пама йышăннă.</p>
<p>Хальхи вăхăтра Чăваш Енри вĕрентӳ тытăмĕнче 20 пине яхăн педагог ĕçлет, вĕсенчен 4 пинĕ — çамрăк специалист. Хушма тĕрев педагогсемшĕн пысăк пулăшу пулĕ, шкулсене кадрсемпе тивĕçтерме май парĕ.</p>