Бер ир үзеннән ит сатып алудан баш тарткан парны балта белән чабып үтергән
Кубаньда яшәүче бер ир-атны 6 ел элек үзеннән ит сатып алырга теләмәгән гаилә парын балта белән чабып үтергән һәм аларның өен яндырган өчен хөкем итәчәкләр. Бу хакта РИА Новости яза.
«Ул 2014 елда Усть-Лабинск районының Суворов авылында гаилә парын үтерүдә, зыян күрүченең зәркән әйберләрен урлауда һәм ир белән хатыннын өен яндыруда гаепләнә. Шулай ук ир-ат полиция хезмәткәрләренә карата көч куллануда да гаепләнә», — диелә хәбәрдә.
Тикшерү версиясе буенча, 2014 елның февралендә гаепләнүче, гаилә яшәгән йортка килә һәм үзеннән ит сатып алуларын сорый. «Хуҗа ит сатып алудан баш тарта, шул сәбәпле алар талаша һәм сугышып китә», — диелгән хәбәрдә.
Тикшерү комитеты идарәсе мәгълүматлары буенча, иренә ярдәм итү өчен ишегалдына хатыны чыга. Ул үзе белән балта алган була. Гаепләнүче бу балтаны кулына төшерә һәм ир белән хатынны чабып үтерә. Шуннан соң мәетләрне өйгә кертә, ут төртеп яндыра һәм кача.
2018 елның ноябрендә бу ир-ат Эчке эшләр министрлыгының җирле бүлегендә җәза срогын үткән була. Шул вакытта камерага инспектор кергәч, ир-ат камерадан чыгып китәргә тырыша һәм полиция хезмәткәренең башына суга.
«Усть-Лабинский районында яшәүче ир белән хатынга карата җинаять кылган кешенең кем булуы озак вакыт ачыкланмады. Ләкин 2018 елда ир-атның бу җинаятькә катнашы барлыгы беленә. Җинаять эше судка җибәрелде», — диделәр тикшерү ведомствосында.