«Түбән Кама Нефтехим»да санитар зонаны төзекләндерү өчен 500 миллион сум бүлеп бирелә
0
62
(Казан, 1 февраль, «Татар-информ»). «Эшлекле дүшәмбе» киңәшмәсендә Түбән Кама муниципаль районы Башкарма комитеты җитәкчесе Рамил Муллин үзенең Тобольскига эш сәфәре турында сөйләде. Эш сәфәрендә алар «Түбән Кама Нефтехим» вәкилләре белән берлектә СИБУР сәнәгать мәйданчыкларының («ЗапСибНефтехим») эш тәҗрибәсен өйрәнде. Бу хакта Түбән Кама муниципаль районы рәсми сайты нда хәбәр ителә. «Безгә компаниянең социаль инфраструктура, халык белән эшләү өлкәсендә ничек эшләгәнен аңлау бик мөһим иде. Безгә җитештерү өлкәсендә дә, хезмәткәрләргә карата мөнәсәбәттә дә өйрәнерлек нәрсәләр бар. Быел «Түбән Кама Нефтехим»да санитар һәм техник зоналарны төзекләндерүгә генә дә компания җитәкчелеге 500 миллион сум бүлеп бирергә планлаштыра. Аларда куркынычсызлык һәм хезмәт нәтиҗәлелеге беренче урында тора. Тобольскида халыкның күчеп китүен киметү һәм демографик хәлне ныгыту өчен, СИБУР җитәкчелеге тарафыннан «Тобольск-2020» программасын төзү турында карар кабул ителгән. Аның буенча шәһәрдә мәгариф, сәламәтлек саклау, мәдәният, спорт һәм шәһәр мохитенә караган кырыктан артык объект төзелгән, яңартылган, капиталь ремонтланган», — ди Рамил Муллин. Сүз уңаеннан, программаның гамәлдә булуы 2030 елга кадәр озайтылган. Бу тарихи-мәдәни мирас объектларын торгызу белән бәйле булачак һәм туризм өлкәсендә кече һәм урта эшмәкәрлек өчен яңа икътисад булдырырга мөмкинлек бирәчәк. 2022 елның март һәм апрель айларында иҗтимагый фикер алышу булачак, алар барышында шәһәр халкы программага беренче чиратта нинди проектлар һәм объектларны кертергә кирәклеге турында үз фикерен белдерә алачак. Моннан тыш, эш сәфәре кысаларында Түбән Кама вәкилләре берничә социаль объектта булган: балалар сәнгать мәктәбендә, ябык скейт-паркта, яңа мәктәптә, спорткомплекста, предприятиеләргә белгечләр әзерли торган «СИБУРИНТЕХ» укыту үзәгендә. «СИБУРның килүе безнең тарих өчен уңай сәхифә булыр дип уйлыйм. Без күп кенә социаль проектларны гамәлгә ашыруда хезмәттәшләр булачагыбыз турында килештек», — диде Рамил Муллин.