Кыргызстан Орусиядагы 519 жаранын Казакстан аркылуу алып келе жатат
0
31
Орусиянын Казакстан менен чек арасында топтолуп турган кыргызстандык мигранттар маселеси негизинен чечилди. Бул тууралуу 5-майда Кыргызстандын Орусиядагы элчилигинин расмий өкүлү Гүлбарчын Байымбетова кабарлады.
Элчиликтин маалыматына караганда, 5-майда Оренбург облусунун Соль-Илецк аймагынан казак тарапка тогуз автобус менен жалпысынан 519 кыргыз жараны өттү. Алардын 155и бул облустун Бузулук шаарында, калгандары ушул Соль-Илецк шаарынын четинде топтолуп тургандар.
Автобустардын жетөөнүн жол акысын кыргыз өкмөтү төлөдү, экөөнүкү коммерциялык негизде каржыланды.
Орусиянын шаарларынан автоунаа менен жолго чыккан кыргыз жарандары коронавирустан улам киргизилген чектөөлөрдүн айынан орус-казак чек ара тилкесинде турганына 1,5 айга чамалаган.
Соль-Илецк аймагындагы чек ара өткөрмөсү 17-мартта жабылып калган.
Элчилик кабарлагандай, ал жерде дагы 70ке жакын кыргызстандык калып калды. Алар жеке машинасында чек ара ачылганча күтмөй болушту.
Ал эми Бузулук шаарында 300дөй мигрант топтолуп турган, алардын 155и (негизинен кош бойлуулар, балдар жана улгайгандар) бүгүн Соль-Илецкиден жолго чыкты.
Казакстан чек арада топтолуп турган кыргыз мигранттарына бир жолку транзиттик жол ачып берүүгө макул болуп, бирок алар атайын уюштурулган автобустар менен гана ташыларын айткан жана жеке автомашинасын ар бири ошол жактагы токтотмолорго калтырышы керек деген шарт койгон.
Кыргызстандын Тышкы иштер министрлиги мигранттар казак-кыргыз чек арасына жеткенче Казакстандын 2 миңден ашуун чакырымын, төрт облусун аралап өтөрүн билдирген. (RK)