Ковидтан үлгән журналист Алия Арслановага багышлап, әнисе бәет чыгарган
Озак авырудан соң, 12 февральгә каршы төндә Самарадагы «Бердәмлек» газетасының әйдәп баручы хәбәрчесе, өлкәнең «Туган тел» татар җәмгыятендә шура әгъзасы Алия Арсланова ковидтан вафат булган , дип язган идек.
Самара өлкәсенең Камышлы районы Яңа Ярмәк авылында яшәүче Зөлфия Шиһапова мәрхүмә кызы - журналист Алия Арслановага багышлап бәет чыгарган. Бу турыда Самара татарлары сайты хәбәр итте.
Күпме калды әйтелмәгән сүзләр…
Кызым Алия Арслановага багышлыйм. Рухына дога булып ирешсен.
Ышанмыйм мин балам киткәненә Мәңгелеккә, безне калдырып…
Бәлки, яман төшләр генә йөри Безнең араларда адашып?
Син яшәргә тиеш идең,
Бигрәк изге булды күңелең.
Дөнья матурлыгын күрә белеп, Юк-бар нәрсәгә дә сөендең.
Югалтасым килмәде бит сине, Аңла, балам, җаным, син мине.
Авыр чирләр сине алып китәр, дип Башыма да минем килмәде.
Күпме калды әйтелмәгән сүзләр, Алда булыр әле көннәр, дип…
Кем уйлаган шулай аяз көндә Каты яшен сугып китәр дип.
Төшләремә керәсең дә бит, Бик тиз югаласың нигәдер.
Матур карлар яуганда да
Кагылып аласың да эреп бетәсең.
Яшел келәм булып алдыңа ятсам да, Аңлыйм, кайта алмавыңны беләмен.
Тик йөрәк бит ышанмый ул, Гомерем буе сине көтәрмен.
Гафу ит син мине, Алия балам, Кирәк чакта булыша алмадым.
Авыр сырхау белән чирләгәндә Яннарыңда була алмадым. Әллә ничек китте дөньялары: Каян чыкты «кызыл зоналар»?
Йөрәктәге якын сүзләрне дә Әйтә алмыйсың соңгы минутта…
Кышкы салкын көннәрдә син Киттең мәңгелеккә, безне калдырып.
Ләкин йөрәкләрдә калырсың син Якты жылы кояш нурлары булып.