«Бәллүр каләм»: «Журналистика – минем гомерлек чирем, аннан котылмасам иде»

Татарстанда Матбугат көнен ел да зурлап бәйрәм итәләр. Быел да ул мөхәррирләрнең ТР Дәүләт Советы Рәисе Фәрит Мөхәммәтшин белән матбугат очрашуыннан башланып китте. Шул ук көнне ТР Журналистлар берлеге съездында рәис тә сайланды. «Татмедиа» бинасы янында «Медиапикник» һәм «СМИшная улица» ярминкәсе эшләде.

• Журналистлар берлегенең ХXI съезды: Шул ук рәис, хезмәт хакы һәм кадрлар проблемасы

Фото: © «Татар-информ» архивы

Журналистика һәм массмедиа өлкәсендә «Бәллүр каләм» XXVII республика конкурсына йомгак ясалу көннең иң көтеп алынган чарасы булды. «Татмедиа» янында төзелгән мәйданчыкка республиканың бөтен матбугат чараларыннан журналистлар җыелган иде. Мөгаен, халыкара чараларда да бу кадәр журналист җыелмый торгандыр.

Аннары иң кызыгы – журналист халкы ул үз бәйрәмендә дә эшли. Чөнки, кабаттан Журналистлар берлеге рәисе итеп сайланган Илшат Әминов әйтмешли, журналистлар язмаган икән, вакыйга булмаган булып исәпләнә. «Әгәр үткәнебез – тарихчылар, киләчәк футурологлар һәм фантастлар кулында булса, хәзерге тормыш журналистлар кулында», – дип белдерде ул.

• Илшат Әминов: Хәзерге тормыш журналистлар кулында

Ничек кенә кызык яңгыраса да, үзебез язабыз, үзебез бәйрәм итәбез, үзебез сөенәбез. Моны дәрәҗәле кунаклар арасында булган ТР Премьер-министр урынбасары Ләйлә Фазлыева да билгеләп үтте.

«Бәллүр каләм» – профессионализм, осталык бәйгесе. Халык сездән һәрвакыт төгәл, ышанычлы мәгълүмат көтә. Журналист – ул миссия, ул күңел халәте. Хезмәтегез, тормышка, кешеләргә мөнәсәбәтегез, Россия һәм Татарстан дан тоткан һәрнәрсәгә сакчыл карашыгыз өчен рәхмәт», – диде Ләйлә Фазлыева.

Хәрби операция зонасында 4 тапкыр булган журналист: «Иң истә калганы – кешеләр»

Быел «Бәллүр каләм»гә 13 номинациядә 1,5 меңнән артык гариза килгән. «Татмедиа» матбугат һәм массакүләм коммуникацияләр буенча республика агентлыгы җитәкчесе Айдар Сәлимгәрәев бәйгенең мәгънәсе гаризалар санында булмавын әйтте. «Ел саен эш үзгәрә. Журналистикада үзгәрешләр артыннан өлгерергә һәм барысын да вакытында үзгәртеп корырга кирәк. Конкурсның мәгънәсе дә шунда», – дип билгеләп үтте Сәлимгәрәев.

Замананың, шул исәптән җәмгыятьтәге тема, тарихи һәм сәяси үзгәрешләр чыннан да беренче булып журналистларга кагыла. Шуңа бәйле рәвештә, бәйрәмдә махсус хәрби операцияне дә искә алдылар. «Һөнәрендә иң яхшысы» номинациясендә җиңүчеләрне Россия Герое Рәсим Баксиков бүләкләде. Ул сугыш хәрәкәтләрендә һәлак булган журналистларны бер минутлык тынлык белән искә алуны сорады.

«Сер түгел, хәрбиләр журналистларны, бигрәк тә хәрби корреспондентларны хөрмәт итә. Аларның үзләре белән коралдан камера һәм микрофон гына бар. Хакыйкатьне сөйләргә һәм кешеләргә мәгълүмат җиткерергә омтылып, алар үз тормышларын куркыныч астына куялар», – диде Баксиков.

«Һөнәрендә иң яхшысы» булып, «ТАТМЕДИА» департаментының социаль медиа бүлегенең баш белгече Равил Мөэминов танылды. 20 еллап телевидение өлкәсендә эшләүче журналистка «Татарстан Республикасының атказанган матбугат һәм массакүләм коммуникацияләр хезмәткәре» дигән исем дә бирелде. Ул хезмәт юлын «Эфир» каналында башлый. Күп еллар «Пятый канал»ның махсус хәбәрчесе булып эшли. Соңгы елларда «Татар-информ» һәм «Татмедиа» агентлыгында хезмәт итә.

Равил Мөэминов махсус хәрби операция зонасында 4 тапкыр булган.

Беренче тапкыр сугышны 2008 елда Көньяк Осетия конфликтында күрдем. Мин андагы бәрелешләрдә бик күп туганнарын югалткан кешеләрнең фаҗигасен төшердем. Хәзер дә курку бар. Хәрбиләр үзләре дә «курку исән калырга ярдәм итә» дип әйтәләр. Соңгы тапкыр барганда, без басуда йөк машинасында йөрдек. Егетләр 2 көн элек кенә шундый ук йөк машинасын шартлатулары, 2 кешенең һәлак булуын сөйләделәр. Анда, хәзер дрон очып килер дә безне дә шартлатыр, дип уйлыйсың.

Иң истә калганы нәрсә булды?

Кешеләр. Мин анда гел «бу тостны кешеләрнең күзләре өчен күтәрәм» дим. Хәрби операцияне күргәннәрнең күзләре башкача, аларның карашы тирән. Ул карашта аларның сиңа караганда күбрәк белгәннәре, үзләре өчен нәтиҗәләр ясаганы укыла.

«Ник бу һөнәрне сайладым икән?» – дип уйлаганым булмады»

«Һөнәрендә иң яхшысы» номинациясендә икенче җиңүче – ДТРК «Татарстан» корреспонденты Айзилә Батырханова. Ул бәйгегә «Уйнагыз, гармуннар» тапшыруын тәкъдим иткән. «Гармун моңын, аның тавышын телевизор экраннары аша яңгырату, онытылып барган көйләрне кабат искә төшерү, үзешчән гармунчыларыбызның тарихлары белән таныштыру – олы максатыбыз. Хәтта Березовский шәһәрендәге шахтага төшеп, 512 метр тирәнлектә гармун тавышын яңгыраттык», – диде Айзилә җиңүеннән соң. Ул бәйгедә җиңүчеләр арасында иң яше иде.

Тантана буласы көн алдыннан төнлә йоклый алмадым. Көтмәдем түгел, күңелемнән бик көттем мин ул җиңүне. Гариза биргән вакытта да догаларымны укый-укый: «Эх, матур эшләремнең матур билгесен күрергә язсын иде», – дип теләдем. Журналистлар берлеге сайтында финалистлар арасында исемемне күргәч, ничек сөенгәнемне белсәң икән! Иң-иң журналистлар арасында исемемне күрү – бу минем өчен үзе бер җиңү иде! Ә тантанада кисәк кенә фамилиямнең беренче хәрефләрен ишеткәндә каушап киттем. Әлегә һавадан төшеп җитеп булмый. «Бәллүр каләмем» белән бәхет дулкынында йөзәм. Барысы да котлый! Иң мөһиме «лаеклы җиңүең белән» дип котлыйлар. Шунысы иң рәхәте! Үземне генә түгел, әти-әниемә шалтыратып та котлыйлар. Әти-әнием горурлыгы булу – зур бәхет, – дип уртаклашты Айзилә.

«Журналистикага тугрылык өчен» номинациясендә «Нурлат-информ» журналисты Резеда Гыйняева һәм «Яңа гасыр» телерадиокомпаниясеннән Алсу Әсхәдуллина җиңү яулады. «37 ел гомеремне журналистикага багышладым һәм бер генә тапкыр да: «Ни бу һөнәрне сайладым икән?» – дип уйлаганым булмады. Журналистика – минем өчен эш кенә түгел, ул тормыш рәвеше», – диде Резеда Гыйняева, җиңүеннән соң.

«Туган тел» номинациясендә «Яңа гасыр» телекомпаниясенең Магнитогорскидагы корреспонденты Гөлдар Хафизова җиңде.

1991 елда бүленеш буенча җибәрделәр. Теләп алган, яраткан эш булмады. Остазларым гына бу эшкә мәхәббәт уяттылар. Җиңүемне мин көтмәдем. Бу – безнең команданың җиңүе. Без нәрсәгәдер дәгъва итмичә генә эшлибез. Эшебезне күрсәтәбез дә, үзебез артта калабыз, – диде ул.

«Бәллүр каләм»дә «Мультимедиалы редакция», «Иң яхшы район (шәһәр) редакциясе», «Ел фоторепортеры», «Ел телеоператоры», «Нәтиҗәле матбугат хезмәте», «Популяр блогер» һәм башка номинацияләрдә җиңүчеләр ачыкланды.

• «Бәллүр каләм» республика бәйгесе җиңүчеләре – тулы исемлек

Машина иясе – 50 ел журналистикада эшләүче Риман Гыйлемханов

«Бәллүр каләм»нең көтеп алган иң матур мизгеле – Гран-при тапшыру. Аны ел да һөнәрдәге уңышлары, эшләгән эшләре өчен танылган журналистларга бирәләр. Быел аңа «Ватаным Татарстан» газетасы журналисты Риман абый Гыйлемханов лаек булды. Ул – 50 ел гомерен журналистикага багышланган мәшһүр журналист. Хезмәт юлын Риман Гыйлемханов 1974 елда телевидениедә башлый.

Аның исеме яңгырауга бөтен халык торып басты. Риман абый бу җиңүне көтмәгән иде булса кирәк, күзләре яшьләнде. Аңа ТР вице-премьеры Ләйлә Фазлыева «Лада Гранта» ачкычларын тапшырды.

Сөйләп булмый әле. Олыгайган саен күңел йомшара икән ул. Югалып калдым, дөресен генә әйткәндә. Бер уйласаң, күпме гомер үтелгән, шул ук вакытта яңа гына эшли башладым кебек тоелып китә. Мин гомергә иҗат кешесенә сокланып яшәдем. Журналистика – минем гомерлек чирем, бу чирдән котылмасам иде, – диде Риман абый.

Каршына тезелеп баскан яшь журналистларга карап, матур теләкләрен дә теләде.

Бөтенесе таныш йөзләр. Сезгә – яшь журналистларга карап торуы бик күңелле. Сез – безнең киләчәк, бүтән кешегә ышана торган түгел. Шуңа күрә эшләгез, «дерзайте»! Барысы да әйбәт булыр, – диде Гран-при иясе.

Фото: © «Татар-информ», Энҗе Габдуллина

Бөтен журналистика дөньясы әлеге җиңү өчен эчкерсез сөенде. «Ватаным Татарстан» бүген бәйрәм итә», – диде арабыздан беребез. «Бәллүр каләм» һөнәрдә иң яхшыларын билгеләүне дәвам итсен, республикада журналистика өлкәсе үскәннән үссен иде.