Оӆаң вуӆы ёх емаң хатӆ Надым вошан манас

Хасям сютсяты хатӆатан вуӆы тащан яңхты хоятат Надым вошан оӆаң манам емаң хатаӆан актасисат. Там пуш вуӆы шавиты ёх 90-мет емаң хатӆэӆ постаӆэӆ. Кашң таӆ округ губернатор Кубок шитты ураңан касӆыты хоятат Надым мува ёхтыӆыӆат.

Кат хатӆ сыс нийӆхус команда — сит катсот пеӆа ярсоткем хоят Красноселькупской, Надымской, Пуровской, Тазовской, Ямальской, Приуральской па Ӆорвош районат эӆты кассат. Оӆаң пуш Красноярской край Таймыр мув хоятат касты ёхтыӆысат.

Касты па емаң хатӆа ёхтам хоятата мойӆапса ясаң округ кусяев Дмитрий Артюхов, Надым район куся Дмитрий Жаромских, ООО «Газпром добыча Надым» па «Газпром нефть» генеральной директорңан па па мойң хоятат ястыӆысат.

Мет юраң ёх артаӆасайт. Хор: Альбина Тырлина.

Касты хоятат

Мет воӆаң мойӆапса — округ губернатор Кубок Ямальской район «Харп» община команда шитас. Кашң касапсайн оӆаң, кимет па хуӆмет тахая этам хоятат охан па мойӆапсайн мойӆасайт: снегоходат, электрогенераторат па вуӆы тащан мосмитты пормасат.

Касты хоятат вуӆы ухаӆ шоппи навартсат, тынсяң сува ёваӆсат, хуӆам пуш навармисат, пертысыман, вуӆы ухаӆан, этнобиатлон сирн кассат па вуӆы ёх ӆохан хатэмисат.

Ӆорвош район эӆты касты хоятат кутан тасян яңхты энамты ёх ус. Ӆув кутэӆан Эдуард Лонгортов па Максим Талигин кассатан, нийӆмет пуш Надым вошан манты емаң хатӆа ёхтыӆыӆтан.

Ӆын ясңан эӆты: «Надым воша кашң таӆ ар команда ёхтыӆыйӆ, хоят ар, сишн моӆты места шитты ӆаварт. Касты тахая кашң командая мет юраң, северной многоборье сирн касты хоятат пирыӆайт. Мосаң атэӆ хоят моӆты места вуты верытаӆ. Команда сирн кашң порайн нох этты командайт нох питыӆыӆат.

Ӆорвош командая округ эӆты касапсаятан касты энамты ёх актыӆыӆайт. Муң туп этнобиатлон па ӆохан касты верытӆув. Сит муң рупатаев, уӆты сирэв».

Эдуард Лонгортов па Максим Талигин кассатан. Хор: Альбина Тырлина.

«Кочевая семья — 2024» касапса

Кат хатӆ сыс «Кочевая семья — 2024» касапса маныӆыйс. Там пуш яртъяң семья округ ар таха эӆты ёхтыӆыйс, ветъяңкем хоят сита касас. Хантэт эӆты Лонгортоват хотвоӆ, Ӆорвош район па Мултановат-Сопочинат, Надымской район эӆты усңан.

Ёхтам семьяйт сохӆаӆ, вуӆы кирты пормасӆаӆ, вуӆы ухаӆӆаӆ, ӆэтотӆаӆ этаӆтысат. Ханты хоятӆув хуӆмет местайн масайңан. Лонгортоват вуӆы ухӆаӆ оӆаң тахая этас. Тазовской район эӆты Вэхо-Худи хотвоӆ нох питас.

Муй си касапсайн этаӆтысат, муй пормасат тутӆысат, каматса ясаң Инна Михайловна Лонгортова ястас: «Ты ма эвем, веңем, ханамңаӆам — Нина па Антон пиӆан ёхатсув.

Уӆтэв хуват иса касӆыман яңхӆув. Туняӆ эвем наман хасиӆыйс. Муң па веңев пиӆан вуӆы хота яңхсаман. Няврэмӆува нётӆув. Сяня ёханэв нохӆы пеӆа, Кев пеӆа, Кев тум пелка касӆыӆув. Ям хуват сита уӆӆув. Шеңк хорам тахайт.

Там мува ма оӆаң пуш ёхтыӆысам. Хасям таӆан эвем Ӆорвош районан эвет ухаӆан касӆыйс, нох питас. Сишан тампуш Надым воша емаң хатӆа хорам хоятат ванттыя па муңев альтыя вохсаюв.

Кат хатӆ ёнтам сохӆув, тайты пормасӆув алиӆысӆув, презентация версув, уӆапсаев эӆты потартсув.

Эвем шеңк хорама ёнтасаӆ, няврэмӆаӆа ёнтам порха, тупрат, вайт тутӆысӆы. Ийикеӆ па яма ёнтӆаӆӆы. Ма па ханшийн ёнтам эви вай тутӆысам. Нина Кирилловна па ӆуматты сохат этаӆтыйс.

Ӆэсятам ӆэтотӆув: няр нёхи, няр хуӆ этаӆтысув. Сит ханты хоятат ӆэты ӆэтотат. Сяӆта кавартам вуӆы няӆам, сам, потам хуӆвой па па ӆэтотат альсув».

Ханты мир уӆапсаеӆ алиӆысат. Хор: Альбина Тырлина.

Вуӆы ёх па няврэмат кеша рупитты харат

Емаң хатӆатан передвижной диагностический «Мобильный центр здоровья» рупитас. Кашң вуӆы шавиты ёх тохи яңхты верытас. Вет вуӆы хот ӆонсиӆыса: пут кавартса, шай йинсьса.

Тынасты хар ус: хуӆ, нёхи, вонсямот, куртаң па мойң хоятат арсыр пормас ӆутты верытсат.

Няврэмат кеша ар ёнтты хар верман ус, касапсаятан касты рахас, конькийн хатэмиты, моӆты ӆутты. Кимет хатаӆан, викторинаятан (вет этап) касты хоятат, хой вет нэпек шук актас, лотерея хуват мойӆапса шитсат.

Няврэмат кеша ар ёнтты хар верман ус. Хор: Альбина Тырлина.

ЭкоВуӆыхот проект верса

Округев хуват вуӆы ёх емаң хатӆат манты питсат. ЭкоХот проект хуват рупитты хоятат там пуш манты емаң хатӆатан вет воша яңхӆат. Мет оӆңа Надым вошан рупатаеӆ пуншсэӆ.

Вуӆы хот ӆонсиӆыса, сита хоятата потартса, хоты нампар лакки понман акатты мосаӆ. Хоты ант мосты пормасат эӆты кимет пуш моӆты ӆэсятты рахаӆ. Мастер-классат мантсат: экологической сувенират версат, мет каркам отат велошредеран яңхсат па пластиковой хошап аӆат ая шукатсат, викторинайн кассат, экология эӆты нэпекат вантсат па ӆуңатсат. Кашң хоят тохи янхмаӆан, ант мосты пормас туты верытас.

Кашң хоят тохи янхмаӆан, ант мосты пормас туты верытас. Хор: Альбина Тырлина.

Надым лепан касӆыты хоятат

Надым воша кашң таӆ Муравленко вош эӆты касӆыты хоятат ёхтыӆыӆат. Хотвоӆ хоятӆаӆ «Кочевая семья — 2024» касапсайн, ёх хоятат касты тахайн касӆат.

Хотвоӆ касапсайн там пуш Мултановат-Сопочинат семья касас. Фаина Мултанова си касапса эӆты потар верас: «Муң Надым лепан касӆыӆув, вуӆы шавиман уӆӆув. Хуӆам хот тайӆув: таӆан йи тахайн уӆӆув, сусан, ӆуңан па товийн па хотатан. Куртэван муң утся уӆӆув, хуӆам километрайн икем аңкеӆ-асеӆ па ун асеӆ-ун аңкеӆ уӆӆат.

Оӆаң пуш Надым воша вуӆы ёх емаң хатӆа ёхатсув. Муң аӆ тый вантты ёхатты утсисув. Куртэван связь антом ус. Няврэмев ураңан мантсув, оӆаңмет классан утаӆтыйӆ, каникуӆая туты утсисэв. Си порайн ястасаюв, тый касты китӆаюв.

Ин вуӆыӆув товийн касӆыты тахаята воштаӆӆув. Вуӆыӆув муң вантӆаӆув, аңкев-асев сютсяӆат. Кум ант тайсув туңа сира ӆэсятыты. Касты тахайн тайты сохӆув, вуӆы ухӆэв, ӆэсятам ӆэтотӆув этаӆтысув па уӆапсаев эӆты потартсув. Хуӆам няврэм энмаӆӆув. Хоӆ тый ёхтыӆысув. Сохӆам ма иса ёнтӆаӆӆам. Аңкем, ун аңкем, икем аңки эӆты инсясӆам, хоты туңа сира эватты, ёнтты мосаӆ. Муң куртан, вошан ант уӆӆув, иса касӆыман яңхӆув. Ун эвев интернатан уӆ».

Кат хатӆ сора манамтас. Ар таха эӆты касты па мойң хоятат ям номасан ёхӆы мантсат. Тыӆась сыс округ хуват вуӆы шавиты ёх арсыр тахайн яха уйтантыты питӆат. Па пуш вуӆы тащан яңхты хоятӆув рутӆаӆ, ӆухасӆаӆ пиӆан па уйтантыӆат па яха ёхатӆат.

Хотвоӆ касапсайн там пуш Мултановат-Сопочинат семья касас. Хор: Альбина Тырлина.

Альбина Тырлина ханшам потар