Әнисе белән Гыйрак төрмәсендә яшәүче сабыйны Чаллыдагы әбисе тәрбиягә алачак

Чаллыда яшәүче хатын югалган улының баласын эзләп тапкан. Сабый Гыйракта төрмәдә туган. Әбисе аның үзенең оныгы булуын исбатлаган инде. Хәзер баланы әбисенә тәрбиягә бирү өчен рәсми мәсьәләләр хәл ителә. Бу турыда «Челнинские известия» яза.

• «Әнисе гомерлеккә төрмәдә»: Чаллы хатыны Гыйрак төрмәсендә туган оныгын кайтару өчен тырыша, дип язган идек. Югалган Чаллы кешесенең хатыны – Якын Көнчыгыш илләренең берсенең гражданы, бу хатын гомерлеккә хөкем ителгән һәм хәзер Гыйракта төрмәдә утыра. Ул төрмәдә чакта бала таба. Хәзер ул кызын Чаллыдагы әбисенә тәрбиягә бирергә тели.

Гадәти булмаган тарихның дәвамы турында шәһәр судының матбугат хезмәтендә сөйләгәннәр.

Моңа кадәр билгеле булганча, Гыйрак төрмәсендә туган оныгы белән туганлык фактын Чаллыда яшәүче хатын исбатлаган. Аннары балага туу турында таныклык алу өчен ЗАГС идарәсенә мөрәҗәгать иткән. Ул улының 10 ел элек Мисырга озак вакытка китүен сөйли. Соңгы 5 елда улы аңа гел шалтыратып тора, аннары югала. 2021 елда Кызыл Хач вәкиле бу хатынга улының хәбәрсез югалуы турында хәбәр итә.

«Челнинские известия» алдарак язганча, югалган ир-атның хатыны сүзләренчә, ул 2017 елда Якын Көнчыгыш илләренең берсендә һәлак була, ләкин аның үлеме турында рәсми белешмә юк. Чаллыда яшәүче хатын улының хатыны чит ил гражданы булуын, 5 ел элек төрмәдә бала табуын һәм кыз баланы әбисенә тәрбиягә бирергә теләвен дә ачыклый.

Якын Көнчыгыш илләрендә Россия илчелеге дипломатлары белән очрашуда бу хатын баласын Чаллыдагы әбисенә опекага бирүгә, шулай ук баланы Россиядә дәвалауга рөхсәт итә.

Россия Тышкы эшләр министрлыгы, Россиядә бала хокуклары буенча вәкил ярдәмендә, хәзер анасы белән төрмәдә булган бала белән туганлыкны раслау өчен молекуляр-генетик экспертиза ясыйлар.Тикшеренү әтисе ягыннан әбисе һәм онык кыз арасында туганлыкны раслый. Ләкин баланың туу турында таныклыгы булмау борчу китереп чыгара.

Россия Тышкы эшләр министрлыгы вәкиле белешмәсе буенча, онык туу турында документны сорап мөрәҗәгать җибәрелгән. Ләкин Якын Көнчыгыш илендәге ведомство белән багланышларны исәпкә алганда, документы алу ихтималы бик аз.

Шуңа күрә Чаллыда яшәүче хатын ЗАГС идарәсенә бала тууны теркәүне сорап мөрәҗәгать итә. Биредә аңа тиешле формада документ булмаган очракта, бер яки аннан да зуррак яшьтәге баланы теркәү суд карары нигезендә генә башкарылуын әйтәләр. Бу – баланың хокукларын (шул исәптән белем алуга, медицина тикшеренүенә, социаль түләүләргә) тәэмин итү өчен кирәк.

Нәтиҗәдә, суд баланың ата-анасын күрсәтеп, аның туу фактын ачыклый һәм раслый. Хәзер Чаллыда яшәүче хатын оныгына опекунлык рәсмиләштерә алачак, диелә бу хәбәрдә.