Өзгөндө өлтүрүлгөн таксист, эл салган оорукана
0
133
"Азаттык" аймактардагы кабарчылар жиберген сүрөт жана видеолор топтомун жарыялоону улантат.
Жалал-Абад
Жалал-Абад шаарында 29-июлдан тартып алгачкы түнкү стационар иштей баштады. Жалал-Абад мамлекеттик университетинин спорт залында ачылган жай 20 орунга ылайыкталып, дарыгерлер жана ыктыярчылар бейтаптарды кабыл алууда. Жаңы ачылган стационардын дарыгерлери коомчулуктан жардам күтүшөт.
Бишкек
Кыргызстанда 30-июлга карата коронавирус жуктурган 35 143 адамдын 24474ү айыгып кетти. Дарыгерлер бейтаптардын өмүрүн сактап калып, эл катарына кошуу үчүн күндүр-түндүр бел чечпей эмгектенип жатышат. COVID-19 илдетине чалдыккан бейтаптар дарыланган “кызыл зонада” иштеген дарыгерлер кандай оор кырдаалда эмгектенип жатышканын айтып беришти.
Адам өмүрүн сактап калуу үчүн күрөшкөн ондогон дарыгер жарыкчылык менен кош айтышты. "Азаттыктын" "Пандемия: Кимди жоготтук" тизмеси боюнча көз жумган медицина кызматкерлеринин саны 60ка чукулдады.
Боронов: Чүй, Ысык-Көл жана Жалал-Абад облустарында вируска чалдыккандар көбөйдү
Чүй, Ысык-Көл жана Жалал-Абад облустарында коронавирус менен ооруп жаткандар көп болуп жатат. Буга байланыштуу коопсуздук чараларын күчөтүш керек экенин премьер-министр Кубатбек Боронов 30-июлда Коронавируска каршы күрөшүү боюнча республикалык ыкчам штабдын жыйынында билдирди.
«Учурда жаңы ооруканаларды куруу жана өлкө аймактарында колдонулбай турган имараттардын багытын өзгөртүп, медициналык мекемеге ыңгайлаштыруу боюнча иштер жүрүүдө. Ошол эле учурда эксплуатацияга бериле турган ооруканалар менен бейтапканаларды керектүү медициналык жабдуулар менен камсыз кылуу боюнча жумуштарды жасоо зарыл. Алардын өз учурунда көрсөткөн көмөгүнөн бейтаптын кийинки ал-абалы жана таза айыгып чыгышы көз каранды.
Мындан тышкары Дары-дармек менен камсыздоо департаменти үзгүлтүксүз негизде аймактардын, ар бир алыскы айылдын тийиштүү медикаменттер жана жабдуулар менен камсыздалышын көзөмөлдөшү зарыл.
«Тез жардам» кызматы кайрылгандарга өз учурунда көңүл бурушу керек, алар келбей жана көмөк көрсөтпөй калган учурлар болбошу керек», - деди Кубатбек Боронов.
Талас
Кара-Буура районунун Кызыл-Адыр айылындагы аймактык ооруканасынын аймагында коронавирус илдетине чалдыккандарды дарылоо үчүн эски имарат ашар жолу менен оңдолуп жатат.
"Кара-Буура Жаштар Биримдиги" уюму иштин жүрүшүн чагылдырган сүрөттөрдү "Фейсбуктагы" баракчасына жайгаштырып, бул ишке жалпысынан жаштардын жана демөөрчүлөрдүн жардамы менен беш миллион сомдун тегерегинде каражат сарпталарын жазды.
Саламаттык сактоо миинстрлигинин Талас облусу боюнча координатору Айжамал Шамбетованын "Азаттыкка" билдиргенине караганда, оңдолуп жаткан бул имарат оорукананын эски имаратынын жарактан чыгып калган кабыл алуу бөлмөсү болчу.
"Кара-Буура райондук ооруканасынын администрациясынын эмгек жамааты мыкты. Бул оорукананын алдында кабыл алуу бөлүмү бар болчу. Ал имарат таптакыр жарактан чыгып калган. Алар тыйын чогултуп, ашар жолу менен бүтүрүп жатат. Жакында эле губернатор барып, жеринен таанышып, "Бакубат" фондунан дагы миллион сом которуп беришти. Анан кийин бир миллион сомду менимче Кара-Буура районунун ошол жердеги Кировка айылдык кеңеши (Кызыл-Адыр айылдык кеңеши) которуп берди. Бул эски имаратты капиталдык оңдоодон өткөрүп жатышат.
Бул имараттын дубалы эле калган. Эшик, каалга, электр зымдарынан баштап чатырына чейин жаңыртылат. Даараткана салынып, суу киргизилип, канализацияга туташылат.
Оорукананын жугуштуу оорулар бөлүмү талаптарга жооп бербейт. Инфекциялык бөлүмдүн имараты 1990-жылдардын аягында авариялык абалга кептелип, ал жактан чыгарып салган. Анан жугуштуу оорулар бөлүмү жалпы имаратта 2-кабатта жайгашып калган.
Учурда коронавирустан улам бейтаптарды обочо шартта дарылоо зарылдыгы келип чыкты. Болбосо коронавируска чалдыккандарды 2-кабатка жаткырса, оорукананын ишмердүүлүгү толук токтоп калат. Кабыл алуу бөлүмү жөн гана бейтаптарды кабыл албастан, фильтр катары пайдаланылат. Дене табы көтөрүлүп, коронавирустун симптому барлар ошол жерге жаткырылат",-деди Шамбетова.
Ош
29-июль күнү Өзгөн районунун администрациясынын алдына 100дөн ашуун адам чогулду. Алар киши колдуу болуп каза болгон Өзгөн районуна караштуу Заргер айылынын 29 жаштагы тургунунун өлүмү калыс тергелишин талап кылышты.
Бул тууралуу Өзгөн районунун акиминин биринчи орун басары Болот Дыйканбаев билдирди:
«Алар соттордон, милициядан «кылмышкерлерди соттоп бересиңер» деген талап коюп келишиптир. Биз көзөмөлгө аларыбызды айтып, түшүндүрдүк. Алар кылмыш кылгандар акча берип чыгып кетишинен чочулап жатышат».
Дыйканбаевдин айтымында, нааразылыкка чыккан маркумдун туугандары, айылдаштары бийлик өкүлдөрү жана укук коргоо органдарынын жетекчилиги менен сүйлөшүүдөн соң тарап кетишкен.
Ош облустук ички иштер башкармалыгынын маалыматына караганда нааразылык акциясы учурунда эч кандай мыйзамсыз аракеттер болгон эмес.
Таксистти өлтүрүү жана анын өлүмүн жашыруу үчүн шектүү төрт адамдын бөгөт чарасы каралып, эки айга камакка алынган.
Мурда таратылган маалыматтарга караганда жергиликтүү милиция автоунаасы менен кошо өрттөлгөн адамдын сөөгүн 27-июлда тапкан. 29 жаштагы такси айдоочу дайынсыз жоголгону тууралуу арыз менен жакындары 19-июлда кайрылган.
Курман айт намазы да бул жолу мечиттерде жана аянттарда окулбайт
31-июлда Кыргызстандын мечиттеринде жана аянттарында Курман айт намазы окулбайт. Муфтият бул тууралуу 27-июлда билдирүү таратып, мындай чара коронавирус эпидемиясына байланыштуу көрүлүп жатканын жарыялаган.
Мусулмандардын дин башкармалыгы COVID-19 инфекциясынын жайылуу коркунучу бүтө элек экенин жана илдеттин мындан ары күчөп кетүүсүнө жол бербеш керек экенин белгилеген. Муфтият элди мындай чечимди туура түшүнүү менен кабыл алып, Курман айт майрамын башкалардыкына айттап барбастан, үйдөн белгилөөгө чакырган.