«Апрель азагында кар ява»: җылы көннәр кайчан кайта һәм бәрәңгене кайчан утыртырга
Кояшлы җылы көннәрдән соң Идел буе шәһәрләрендә апрель уртасында кар яуды. Арктик агым Татарстанга да килеп җитте. Җылы көннәр кайчан кире кайтачак, җылылык сезоны кайчан тәмамланачак һәм бакчачылар кайчан бәрәңге утырта алачак?
«Бу – апрель ахыры өчен шактый саллы күрсәткеч»
Быел апрель ае Россиянең урта полосасында яшәүчеләргә күңелсез сюрприз алып килде – яз уртасында кыш яңадан кайтты. Кар сайланып кына «һөҗүм итте». Кар 200-250 километр киңлектәге полоса буенча яуды – Туладан башлап Кировка һәм Пермьгә кадәр сузылды.
«Бу полосада җитди кар яву булды. Түбән Новгородта кичә иртән кар катламы биеклеге 21 сантиметр, ә Рязаньдә рекордлы 25 сантиметр булган. Бу – апрель ахыры өчен шактый саллы күрсәткечләр», – дип сөйләде «Татар-информ»га «Метео» һава торышы фаразлары үзәге җитәкчесе Александр Шувалов.
Татарстан кар циклоны перифериясендә калды. 21 апрельдә көндез республиканың аерым районнарында карлы яңгыр явуга да карамастан, синоптиклар тынычландыра: «Бер кар бөртеге – кар яву түгел әле. Явым-төшем безнең төбәкне читләтеп узды».
Татарстанның Гидрометеорология һәм әйләнә-тирә мохитне күзәтү идарәсе җитәкчесе Феликс Гоголь сүзләренчә, алдагы көннәрдә Татарстан ап-ак кар астында калмаячак, әмма шулай да, «кыш сәламе» көтелә.
«Чувашия яки Киров өлкәсендәге кебек масштабтагы һәм интенсивлыктагы күренешләр бездә көтелми. Шулай да, республикага җепшек кар килде. Явым-төшемнәре өченче көнне башланды: башта яңгыр, ә иртән һәм көндез урыны белән җепшек кар яуды», – дип сөйләде ул.
Хәзер циклон Татарстанны икегә бүлгән. Республиканың көнчыгыш өлешендә җылырак, ә көнбатыш районнарда температура сизелерлек түбән. Татарстанның Гидрометеорология үзәге мәгълүматлары буенча, урыны белән кыска вакытлы кар катламы барлыкка килү ихтималы бар. Төнге сәгатьләрдә температураның ноль градустан минуска китүе аркасында республиканың көнбатыш районнарында юлларда бозлавык булачак.
Фото: © Михаил Захаров / «Татар-информ»
Һава торышы 23 апрельгә яхшыра башлый
Татарстанның Гидрометеорология үзәге мәгълүматлары буенча, алдагы көннәрендә республикада һава торышы салкынча һәм бик тотрыксыз булачак.
Бары тик 23 апрельгә һава торышы әкренләп яхшыра барачак: төбәкнең көнбатыш өлешендә явым-төшемнәр туктый, ә температура күрсәткече 5-10 градуска кадәр күтәреләчәк.
Фото: © Михаил Захаров / «Татар-информ»
«Без апрель башына «чигендек»
Александр Шувалов сүзләренчә, Татарстанда урнашкан салкын һава торышы салкын һава капкыны аркасында килеп чыккан. Хәзер Россиянең Европа территориясе өстендә төньяк-көнбатыш һава агымнары өстенлек итә.
«Европа территориясенә бер-бер артлы Атлантик һәм Баренц диңгезе циклоннары килә. Шуның аркасында хәзер урта полосада һава температурасы климатик нормадан түбәнрәк. Фактта без апрель башына «чигендек», – дип аңлатты белгеч.
Аның сүзләренчә, хәзер бу айга хас булганча, кыш һәм яз тартыша. Алдагы көннәргә һава торышы фаразлары Татарстан халкына температура сикерүләре вәгъдә итә.
«Температура төшү артык озак дәвам итмәячәк. Әмма апрель ахырында һава торышы бик тотрыксыз. Ялларда кабат яңгыр, Татарстанның көнбатышында җепшек кар явачак. Көндез температура кабат 4-6 градуска кадәр төшә», – дип кисәтә синоптик.
Фото: © Михаил Захаров / «Татар-информ»
«Кыш һәм яз көрәше» бәйрәмнәргә төгәлләнәчәк
Озак вакытка ясалган фаразларның төгәллеге югары булмаса да, Александр Шувалов май аена һава торышы буенча фаразларын да әйтте. «Яз һәм кыш көрәше» яз файдасына бәйрәмнәргә тулысынча төгәлләнер, дип өметләнә ул.
«Мондый суытулар гадәттә бер декададан да озакка бармый, шуннан соң яхшырып китә. Беренче май бәйрәмнәрендә һава температурасы якынча 10-15 градус булачагына билгеләр бар», – диде ул.
Аның хезмәттәше Евгений Тишковец сүзләренчә, бу көннәрдәге Арктик «һөҗүмнәр» апрельдә соңгысы булмаячак.
«Ай ахырына кадәр Үзәк Россиядә температура фоны салкынча булачак», – диде синоптик.
Фото: © Владимир Васильев / «Татар-информ»
Майда һәм июньдә кыраулар авыл хуҗалыгы культуралары өчен куркыныч
Россия Гидрометеорология үзәге фаразларынча, Татарстанда быел вегетация чорында һава температурасы апрельдә һәм июльдә нормадан югары, ә июньдә, августта һәм сентябрьдә нормага якын булачак.
Җәй айларында явым-төшем күләме нормага якын булыр дип фаразлана, сентябрь генә коры булачак. Вегетация чоры башлангач, кыраулар куркынычы да була.
«Майда кырау төшү ихтималы зур. Соңгы елларда һәр ел саен диярлек республикада, һичьюгы, бер-ике төн булса да кырау төшү күзәтелә. Тик кыраулар май аенда гына түгел, ә июньнең беренче яртысында да төшәргә мөмкин», – ди Феликс Гоголь.
Шуңа күрә Евгений Тишковец, бакчачыларга бәрәңге утыртырга ашыкмаска, май бәйрәмнәренең икенче дулкынын көтәргә киңәш итә.
Чыганак: «Татар-информ», Наталья Рыбакова