50 спорт мастерне хатĕрленĕскер ячĕпе – турнир

Чăваш Республикин тава тивĕçлĕ тренерĕн Владимир Семеновăн парнине çĕнсе илессипе ирĕклĕ майпа кĕрешекенсен турнирĕ ку таранччен яланах Патăрьел тăрăхĕнче иртнĕ. Кăçал спортсменсем Шупашкарта пухăнчĕç. Ахальтен мар – Владимир Михайловичăн çавра çул. 20-мĕш турнира Атăлçири регионсенчен тата республикăри тăрăхсенчен кĕрешекенсем хутшăнчĕç.

Чĕмпĕрпе Чулхула облаçĕсем, Удмуртпа Тутар Республикисем командăсем тăратнă. Чăваш Ен те кĕрешекенсемпе мухтанма пултарать. Патăрьел, Шупашкар, Вăрнар, Красноармейски, Сĕнтĕрвăрри, Муркаш, Канаш тăрăхĕсем, Çĕнĕ Шупашкарпа Шупашкар тата Канаш хулисем хальхинче те пуçаруллăрах пулчĕç. Вĕсекен пĕр тĕвве пухаканĕ – ирĕклĕ майпа кĕрешессипе Раççей спорт мастерĕ, РСФСР чемпионачĕн çĕнтерӳçи Владимир Семенов.

ВЛАДИМИР СЕМЕНОВ: «Пуçтарăнса килнĕ нумай-нумай хуласенче, пăхăр-ха – вырăн çук. Çакăн пек туслă пурăннине нимĕн те çитмест. Çамрăксем кунта питĕ нумай, ветерансем, хисеплĕ çынсем. Пĕрле пурăннине нимĕн те çитмест. 50 мастер спорта хатĕрленĕ. Вĕсен хушшинче тĕнче чемпионĕсем, Европа чемпионĕсем».

 СЕРГЕЙ СЕМЕНОВ: «209 ача хутшăнать паян. Хĕрачасем 49-ăн, ыттисем пурте арçын ачасем. Ачасем пурте лайăх хатĕрленнĕ. Çĕннисем ытлашши çук».

2010-2012-мĕш çулсенче çуралнă хĕрачасемпе арçын ачасене хавхалантарма, саламлама нумаййăн килнĕ. Вĕсем çамрăксене турнир хуçин пултарулăхĕпе паллаштарчĕç.

БОРИС ЕЗЮКОВ: «82-мĕш çулта Первомайски шкулне пĕтернĕ хыççăн пединститута вĕренме кенĕччĕ. Çавăн чухне Владимир Семенов патне кĕрешме çӳренĕччĕ. Ман вăл иккĕмĕш тренер. Владимир Михайлович патĕнче кĕрешнĕ чухне мастер спортăн кандидачĕн нормине тултарнă. Питĕ хăватлă тренер».

ЮРИЙ МОИСЕЕВ: «77-мĕш çулта паллашнă пирĕн Патăрьел районĕнчи Сабантуйĕнче. Эпир тутарла-пушкăртла икĕ чăваш ачи кĕрешрĕмĕр. Эпĕ çамрăксемпе шкул ачисем хушшинче, Владимир Михайлович çамрăксен хушшинче. Ун чухне иксĕмĕр те иккĕмĕш вырăн йышăнтăмăр. Атте пукан йăтатчĕ. Вăл пире паллаштарчĕ. 77-мĕш çултанпа туслăх пулса кайрĕ. Эпир пурнăçпа туслă».

Паллашу хыççăн чăн ăмăрту пуçланчĕ. «Бросок», «рычаг», «кочерга» – çак сăмахсем ирĕклĕ майпа кĕрешекенсемшĕн ют мар. Кавир çинчи тупăшу хĕрсе те хĕрсе пырать. Ăмăртăва пĕрле килнĕ юлташсем, кĕрешӳ ăсталăхĕпе паллаштаракан тренерсем хавхалантарни те тупăшура пулăшать. Шупашкар районĕнчи Илья Зайцев çак пулăшăва хăйĕн çинче туйрĕ. Акă – çĕнтерӳ те. Турнира 200 ытла ача хутшăнчĕ. Вĕсем кавир çине тухмассерен зал янраса çеç тăчĕ. Çĕнтерӳ çăмăллăн килмест. Çакна пур спортсмен та пĕлет. Маттуррисем, ăстараххисем вара пъедестал çине тăчĕç.