Юсав ĕçĕсене палăртнинчен маларах вĕçлеççĕ
Канаш районĕнчи Вырăскас Пикших ялĕнче пурăнакансем Çĕнĕ çула пысăк парнепе кĕтсе илеççĕ. Кăçал çĕртме уйăхĕнче унти шкулта тĕплĕ юсав пуçланнăччĕ. Строительсем тăрăшса ĕçлени объекта палăртнинчен маларах хута яма май парать. Çĕнетнĕ шкула Чăваш Республикин вĕрентӳ тата çамрăксен политикин министрĕ Дмитрий Захаров хăй вырăна тухса тĕрĕслерĕ.
Вырăскас Пикшихри вăтам шкула 1978-мĕш çултах çĕкленĕ. Хăйĕн вăхăтне тӳссе ирттернĕ пĕлӳ çуртне кăçал федераци программипе çĕнетме тĕллев лартнăччĕ. Ун валли 107 миллион тенкĕ ытла укçа уйăрнă. Ĕç йĕркипе килĕшӳллĕн объекта 2023-мĕш çулхи пуш уйăхĕнче çеç вĕçлемелле пулнă. Подрячик кашни тапхăра вăхăтлăн та тирпейлĕн туса пынă. Çавна май, ачасем те шкула маларах таврăнаççĕ. Çак хыпар вĕренекенсене тата вĕсен ашшĕ-амăшне уйрăмах савăнтарать.
ОЛЬГА НИКОЛАЕВА: «Ачасем урăх шкула ир-ирех тăрса автобус çине тухма пуçласассăн кĕркунне, сивĕсем çитсен питĕ йывăр пулчĕ. Йывăрлăха тӳсме пĕлсе çитни япăх япала мар, анчах та пĕчĕк ачасемшĕн вăл пĕрех йывăртарах, çавăнпа та халь Çĕнĕ çултан çĕнĕ шкула çӳреме пуçласассăн вĕсем, паллах, савăнаççĕ».
Шкулта ăшă, электричество, канализаци тытăмĕсене улăштарнă, видеосăнав хатĕрĕсене вырнаçтарнă, çуртăн тăррине те çĕнетмесĕр хăварман. Халĕ хăтлă та илемлĕ шкул иртен-каяна та тыткăнлать. Юсав хыççăн маларах тивĕçлĕ канăва кайма палăртнă вĕрентекенсен шухăш-кăмăлĕ те улшăннă.
ТАТЬЯНА ЕЛИСЕЕВА: «Ял ачисем çакăн пек шкулта вĕренме пултараççĕ тесессĕн, паллах, пĕр 10 çул каялла эпĕ ĕненместĕмччĕ. Пирĕн çĕлемелли çĕвĕ машинисем те пур, пирĕн мольбертсем кашнийĕн валли пур тата пирĕн шалта, кухньăра пур плитасем, кухонный комбайнсем, пĕтĕмпех оборудовани пур, вĕрентмешкĕн темиçе тĕрлĕ май та пур».
Шкулта ирттернĕ юсав ĕçĕсене Чăваш Республикин вĕрентӳ тата çамрăксен политикин министрĕ Дмитрий Захаров пысăк хак пачĕ. Хăвăртлăхпа пахалăх пĕр-пĕрне хирĕçлеççĕ, анчах та çакă асăннă объектпа пырса тивменнине каларĕ вăл. Çитес çул шкул таврашне хăтлăх кĕртес тĕллевлĕ. Çак ĕçсене çуллахи вăхăтра ирттерме шухăшлаççĕ. Канаш хулинчи 7-мĕш шкула та 2023-мĕш çулта юсаса çĕнетĕç. Кун валли 80 миллион тенкĕ ытла укçа уйăрнă. Ĕçсене çитес вăхăтра пуçлама палăртнă.
ВЛАДИМИР ИВАНОВ: «Эпир малтан улăштаратпăр чӳречесене, ремонт тăватпăр туалетсенче, пищеблокра, столовăйĕнче, кайран, ăшăтсан тăватпăр мягкий кровльăна. 16-мĕш январьте пуçлатпăр, 1-мĕш сентябрь валли пĕтересшĕн».
Пĕтĕмĕшле кăçал республикăра федераци программипе килĕшӳллĕн 12 шкула юсаса çĕнетнĕ. Çак кăтартупа Чăваш Ен ыттисене тĕслĕх кăтартма пултарнине çĕршыв шайĕнче те палăртнă.