Культура ҫурчӗсене вăхăтра туса пĕтерĕç-ши?
Ҫулталӑк вӗҫлениччен республикӑра ҫӗнӗ 6 культура ҫурчӗ уҫӑлмалла. Анчах тӗрлӗ пӑтӑрмаха пула пур ҫӗрте те ӗҫсем кӑл-кал пымаҫҫӗ: те ҫанталӑк чӑрмантарать, те ӗҫлекенсем ҫитмеҫҫӗ. Ҫӗнӗ ҫула пысӑк парне, культура ҫурчӗ кӗтекен халӑхӑн шанӑҫне тӳрре тухĕ-ши? Ҫак ыйтӑва тишкерме тата ӗҫ еплерех пынипе паллашма пирӗн пултарулӑх ушкӑнӗ Шупашкар тата Канаш районӗсене ҫитсе килчӗ.
Юмансар ялӗнче икӗ хутлӑ пысӑк ҫурт инеҫтренех курӑнса ларать. Хальлӗхе вӑл хӑйӗн илемӗпе тата ҫӗнӗлӗхӗпе куҫа илӗртет пулсан, ҫитес вӑхӑтран вара ҫак вырӑн ял халӑхне тӗрлӗ уяв-концерта пухӗ. Килĕшӳ тăрăх культура ҫуртне чӳк уйăхĕн 30-мĕшĕччен туса пĕтермелле пулнă. Анчах, пĕтемпех подрячикран çеç килмест. Ака уйăхĕнче çанталăк çумăрлă тăнине пула ĕçе вăхăтра пуçлайман, çавăн пекех пушар хăрушсăрлăхне тивĕçтерес тĕллевпе лартакан шыв цистернисене те палăртнинчен каярах илсе çитернĕ. Çавна май объекта туса пĕтермелли куна раштавăн 20-мĕшне куçарнă.
АНДРЕЙ АНТОНОВ: «Ĕлкересшĕн, канмалли кунсем те сахал тăвасшăн, çук пекех. Çанталăкĕ пăртак пăсăлать те, нимех те мар, йĕпенетпĕр, типĕнетпĕр, услови пур, материал çитет».
Юмансар ялӗнче 600 ытла çын пурăнать. Вĕсенчен пĕрре виççĕмĕш пайĕ – çамрăксем. Аталанма, чунпа канма культура çурчĕ кирлех, палăртаççĕ ял çыннисем.
ГЕННАДИЙ СТЕПАНОВ: «Клуб пулсассăн çамрăксем те ташлама килеççĕ, концертсем килсе кăтартаççĕ, кӳршĕ яла çӳрес пулать, 3 çухрăма, хамăр ялта пулсассăн пĕтĕм ваттисем килеççĕ вĕт. Пысăк ялта, çакăн пысăкăш ялта пĕр клуб кирлех ĕнтĕ вăл».
АЛЬБЕРТ ФИЛИППОВ: «Ике хутлă, вăйлă проектпа туса хунă, мана килĕшет, паллах. Клуб пулсассăн çамрăксем те юлаççĕ, культура, уровень».
Культура çурчĕ 100 ытла çынна йышăнма пултарĕ. Унта концерт залĕсĕр пуçне вулавăш тата ача-пăча ӳнер шкулĕн филиалĕ пулмалла. Ĕçсене «Культура» наци проекчĕ пулăшнипе пурнăçлаççĕ. Пĕтĕмпе строительство валли 33 миллион тенкĕ укçа уйăрнă.
ЕКАТЕРИНА ФИЛИППОВА: «Пирĕн тĕллевсем пур. Пирĕн Туруново ялĕнче ыйтаççĕ, Анаткас ялĕнче, Шуркасси ялĕнче ыйтаççĕ. Пирĕн унта клубсем кивелнĕ, çавăнпа та эпир унта халь проектсем хатĕрлетпĕр Шуркасси ялĕпе. Ытти Турунова ялĕсене эпир пăхса тухасшăн тепĕр енпеле, урăх программăпа».
Канаш районĕнчи Юмансарти культура çуртĕнчи строительство ĕçĕсене çĕнĕ çулччен вĕçлесшĕн пулсан, Шупашкар районĕнчи Салапайкассинче вара йывăрлăхсем пур. Объект территорийĕнче йĕри-тавра пылчăк çăрăлать, çавна май ĕç палăртнă йĕркерен кая юлса пырать.
БОРИС СЕМЕНОВ: «Эпир сентябрьте пуçланă, фундаментран ĕнтĕ, кашни кун ĕçленĕ, канмалли кунсенче те ĕçленĕ, çанталăк лайăх чухне, халь вăт лартăмăр, иккĕмĕш эрне ĕçлейместпĕр».
Культура çуртне çĕклеме Чăваш Ен Правительстви Шупашкар районне укçа-тенкине вăхăтра çитернĕ. Çавăнпа та подрячикăн килĕшĕве тĕпе хурса ĕçсене раштав уйăхĕнче вĕçлемелле. Шаннă йăвара кайăкĕ пулĕ-ши? Хуравĕ хальлĕхе иккĕленӳллĕ.