План тултарнă
Çурхи ĕçсем вĕçленсе пыраççĕ. Вăрлăх валли куккурус 2 000 гектар çинче акнă. Çак пĕлтĕрхинчен икĕ хут нумайрах. Куккуруса 19 районта апат валли те акнă. Халĕ вăл 13 000 яхăн гектар çинче вăй илет. Пысăк пай Шупашкар, Елчĕк, Вăрнар районĕсене лекет. Кăçал республикăра çу тумалли культурăсен лаптăкне те пысăклатнă, пĕлтĕрхинчен 42 процент ытларах акнă. Улатăрсемпе канашсем ку енпе пуçаруллă. Пĕрчĕллĕ тата пăрçа йышши культурăсене Чăваш Енре 214 000 гектар çинче акнă. Чăваш Республикин ял хуçалăх министерствинчен пĕлтернĕ тăрăх, пĕлтĕр хуçалăхсем çак вăхăт тĕлне 210 000 гектара вăя кĕртнĕ пулнă. Вăрнар, Хĕрлĕ Чутай, Сĕнтĕрвăрри районĕсенче плана тултарман. Çав вăхăтрах йĕпреçсемпе çĕмĕрлесем тыр-пула кирлинчен 10 процент нумайрах акнă. Елчĕксен кăтартăвĕ пысăк – вĕсем акана 20 000 ытларах гектар çинче пурнăçланă. Çĕрпе ĕçлекенсен кĕркунне çĕрулмие те нумайрах гектар çинчен пухса илмелле пулать. Пĕлтĕр ăна пĕтĕмпе те 5017 гектар çинче лартнă. Кăçал халех ку кăтартуран иртнĕ. Хуçалăхсенче «иккĕмĕш çăкăра» лартма чарăнман-ха, Тăвайсем çĕрулмипе пач та ĕçлемеççĕ. Вăрмар, Комсомольски, Патăрьел, Куславкка тăрăхĕсенчи хуçалăхсем ку ĕçе пысăк лаптăкра пурнăçланă. Кăçал хăмлапа ĕçлекен хуçăлăхсем нумайланнă. Вăрнарсем, вăрмарсем, етĕрнесем, çĕрпӳсем çумне тата Шупашкарпа Сĕнтĕрвăрри районĕсем хутшăннă. Пĕлтĕрхи кăтартуран 20 процент ытларах хăмла çакнă. Вăл 121 гектарпа танлашать. Çу кунĕ хĕле тăрантарать тесе ваттисем ахальтен каламан. Республикăри хуçалăхсенче выльăх апачĕ хатĕрлемелли тапхăр пуçланчĕ. Хальлĕхе Канаш, Хĕрлĕ Чутай, Тăвай, Елчĕк районĕсенче 640 гектар синче нумай çул ӳсекен курăк çулнă