Икĕ хула хутшăнать
Республикăри хуласем çулсерен Раççейри «Хула тăрăмне хăтлăлатассине йĕркелесси» проекта хутшăнма пултараççĕ. 2018-мĕш çултан пуçласа 560 проект çĕнтернине палăртнă. Кăçал тата 160 вырăна тирпей-илем кĕртме планлаççĕ. Унта Чăваш Ен те хутшăнать. Хальхинче ведомствăсен йышĕнчи комисси ларăвĕнче Çĕрпӳ тата Пăрачкав заявкисене пăхса тухрĕç. Самах май, иртнĕ çулсенче Етĕрне, Канаш, Улатăр, Сĕнтĕрвăрри, Куславкка, Çĕмĕрле проекчĕсем çĕнтернĕччĕ. Çĕртме уйăхĕн пуçламăшĕнче кирлĕ хутсене хатĕрлесе çитермелле. Кăçал икĕ район ку енпе тимлет. Пăрачкав сали Сăр юханшывĕнчен аякра мар вырнаçнă. Кунта историпе культура объекчĕсем нумай: музей, Александр Невский часавайĕ, Майоров купса çурчĕ тата ытти те. Ялта пурăнакансен сĕнĕвне шута илсе Кооператив урамне хăтлăлатма шухăш тытнă, заявка хатĕрленĕ. Ку вырăнта 14 архитектура çурчĕ. Пĕчĕккисен ыйтăвне мала кăларса вĕсем валли вахăта усăллă вырăн хатĕрлеççĕ, канмалли лапам та пулмалла. Çакна пурне те пурнăçлама малтанласа палăртнă тăрăх, 78 миллион тенкĕ ытла кирлĕ пулать, унтан пысăк пайĕ – федераци укçи. 1589-мĕш çулта хута кайнă Çĕрпӳ те проект хатĕрленĕ. Вырăнти ертӳлĕхпе халăх мăнастир тата икĕ чиркӳ патĕнчи лапама хăтлăлатасшăн. Ача-пăча паркĕ тата çывăхри урамсем илемленмелле. Сад евĕр пулмалла вăл. Палăртнă вырăна 3 пая уйăрнă. Кăнтăр пайĕнче ача-пăча лапамĕ, пĕчĕккисем валли автомашинăпа ярăнмалли трасса тума палăртаççĕ. Садăн çурçĕр пайĕнче, чиркӳ вырнаçнă вырăнта, аллея пулать, канмалли вырăнсем хатĕрлеççĕ. Ленин урамĕ патĕнчи вырăнта вара информаци киоскĕсем, сувенир лавккисем пулаççĕ. Урамăн хирĕç енче хăнасем валли машина лартмалли вырăн тума палăртаççĕ. Палăртнине пурнăçлама 70 миллион тенкĕ ытла пăхса хăварасшăн. Ларăва хутшăнакансем икĕ районăн та проекчĕсем хăйне майлă интереслĕ пулнине палăртрĕç, анчах туса çитерменни те пур. Çĕрпӳсем çитменлĕхсене шута илсе проекта улăштарнă, анчах пĕр ыйту пĕрех татăлмасть – хулара икĕ парка тытса тăма мехел çитĕ-и? Пăрачкавра вара хăтлăлатма палăртнă вырăнта машинăсене çӳреттерме чарсан аванрах пулмалла, усламçăсене проекта ытларах явăçтарни те пăсмасть. Чăваш Республикин Пуçлăхĕ Олег Николаев проектсене ырланине, анчах кĕске вăхăтра çитменлĕхсене пĕтерсе кирлĕ хутсене тăратмаллине каларĕ. Алина Сусметова, Юрий Марков