Паллă ентешсемпе çыхăнтарнă
Тăван çĕршыва юратма та вĕрентеççĕ, çĕнĕ технологисене те алла илеççĕ. Канаш хулинчи цифра вĕрентĕвĕн центрĕнче скретч-программированипе республика конкурсне пĕтĕмлетрĕç. Ăна паллă ентешсен çулталăкне халалланă. Никита Сабанов Улатăр хулинчи иккĕмĕш шкулта тăваттăмĕш класра вĕренет. Икĕ çул каялла вăл скретч программăпа туслашнă. Халĕ ăна вăл тепĕр аслă çынран та аван пĕлет. АЛЁНА ЗАЙКИНА: «Эпир Иван Яковлева суйларăмăр, мĕншĕн тесен Никитăна ун пирки садикре, килте амăшĕсем каласа парса ăна хавхалантарнă. Вăл ун пирки республика конкурсĕнче каласа парас терĕ». Никита Сабанов Иван Яковлев çинчен мультфильм хатĕрленĕ. Ăна вăл шăпах скретч программăпа усă курса ӳкернĕ. Унпа мультфильмсем кăна мар, викторинăсем те çырма май пур. Канаш хулинчи Аркадий Иванов паллă ентешсене халалласа тĕрĕслев хатĕрленĕ. ЕЛЕНА ИВАНОВА: «Ачи иккĕмĕш классра кăна, çавăнпа викторина çав тери йывăр мар. Чăннипе, унăн кочĕ, хăйĕн программине питĕ тĕрĕс çырнă вăл. Ыйтăвĕсем питĕ интереслĕ. Шăкăр-шăкăр тухса пыраççĕ. Унăн пиллĕк ыйту. Кашни паллă çын пирки». Чăваш ачи ыйтăва чăвашла парать. Хуравне пĕлмесен тĕрĕслевре пулăшакан хатĕрсем пур. Республика шайĕнчи конкурсăн финалĕнче 26 ĕçе тишкерчĕç. Вĕсене мульфильм тата викторина номинацисенче тăватă ушкăна пайларĕç: 8-10 çулхисем тата 11-12 çулхи ачасем. КРИСТИНА МАЙНИНА: «Ачасем питĕ лайăх хатĕрленнĕ. Кашни ĕçĕ тивĕçлĕ». Чăнах та, ĕçĕсем тивĕçлĕ. Чи пĕлтерĕшли вара çакна ачасем пурнăçлани. Алексей Зотиков, Георгий Кривошеин