«Казан Экспо»да Ватан сакчыларын җыйдылар: «Алар – зур горурлыгыбыз, терәгебез»
Бу көнне махсус хәрби операциядә катнашучылар, ветераннар, туган җиребез данын яклаучылар, хезмәт итүчеләр адресына күп кенә җылы сүзләр яңгырады. Ил батырларының хезмәте өчен рәхмәт белдерелде.
Батырларга багышланган китап, фотокүргәзмә һәм маскировка
Фойеда күпсанлы күргәзмәләр белән танышу мөмкин иде. Алар «Батырлар. Герои Татарстана» күргәзмәсе булсынмы, шуннан соң «Геройлар янәшә» - «Герои рядом» әдәби бәйгесенекеме – һәркайсы халыкта зур кызыксыну уятты.
Фото: © © «Интертат», Юлай Низаев
Минем игътибарны аеруча Татарстан Республикасы Фотографлар берлеге оештырган «Махсус хәрби операция волонтёрлары» фотокүргәзмәсе җәлеп итте. Әлеге күргәзмә хакында Фотографлар берлеге рәисе, танылган фоторәссам, махсус хәрби операция офицеры тормыш иптәше Виктория Шиһапова сөйләде:
Илебез өчен җиңел булмаган вакытта, яу кырындагы солдатларга ярдәм итүдә бердәм дус команда булу мөһим. Бу фотосурәтләр Татарстанның төрле район-җирлекләрендә һәм Россия төбәкләрендә төшерелгән. Быел республикада игълан ителгән Хәрби һәм хезмәт батырлыгы елы уңаеннан фотокүргәзмәне киңәйтергә һәм тулыландырырга уйлыйбыз. Күргәзмә дәвам итәчәк. Без төрле районнарда һәм шәһәрләрдә яшәүче волонтёрлардан гаризалар кабул итәбез. Кемнәрнең катнашасы килә, көтеп калабыз. Шулай ук районнар чакырса да, барып фотокүргәзмәне тәкъдим итәргә ризабыз, – диде ул.
Викториянең ире мобилизацияләнгән. Бик каты яраланган, ләкин хәрби бурычын үтәр өчен яу кырына әйләнеп кайткан.
Фото: © «Интертат», Юлай Низаев
Маскировка челтәрен үрүче кызлар, апалар да очрады. Бик җентекле эш, күңел җылысы белән үрелә. Маскировка челтәрен үрү техникасы күп көч таләп итә. Ятьмә үрүче әти-әниләрнең һәркайсы аларның кемнеңдер тормышын саклап калырга ярдәм итәчәгенә чын күңелдән ышана.
Фото: © «Татар-информ», Владимир Васильев
«Балаларның шат тавышлары, әниләрнең җылы елмаюлары хакына»
Тантана экранда күрсәтелгән тематик видео белән башланып китте. Анда балалар авазыннан Ватан сакчыларына чиксез рәхмәт сүзләре әйтелде.
Кайчандыр алар да мәктәп укучылары булган, меңләгән балалар кебек парта артында утырганнар…. Аннары нәкъ безнең кебек хыялланганнар, йөгергәннәр, ә үсеп җиткәч, безнең яклаучыларыбызга, саклаучыларыбызга әйләнгәннәр. Бүген алар илебез иминлеге хакына көрәшә. Балаларның шат тавышлары, әниләрнең җылы елмаюлары хакына! Безнең тыныч илдә, тыныч тормышта яшәвебез өчен. Ил сакчысы булу – зур кыюлык, иксез-чиксез тугрылык сорый. Алар якыннарын ташламаучы, авыр чакта терәк була белүче олы йөрәкле затлар. Алар дәүләтебез чикләрен генә түгел, бөтен дөньяны, йортларыбызны һәм бәхетле балачагыбызны явыз көчләрдән саклый, – дигән сүзләр ишетелде.
«Ватанны саклаучылар – ул кулына корал тоткан кеше генә түгел»
Алып баручылар исә агымдагы ел – Татарстан Республикасы Рәисе фәрманы нигезендә Хәрби һәм хезмәт батырлыгы елы булуын ассызыклады.
Бәйрәм белән, кадерле дуслар! Бүген без илебез иминлеге өчен хезмәт итүчеләргә, халкыбыз тынычлыгы өчен көрәшүчеләргә дан җырлыйбыз. Алар – зур горурлыгыбыз, безнең терәгебез! Бердәмлектә безнең төп көчебез. Безнең күпмилләтле халык иң авыр вакытларны бергә үтте. Хәзерге чорда да һәркем, бер йодрык булып, җиңү өчен тырыша. Кемдер алгы сызыкта, кемдер тылда хезмәт итә, – диде алып баручылар.
Фото: © «Татар-информ», Владимир Васильев
Алга таба сәхнә түренә Россия һәм Татарстанның дәүләт флаглары чыгарылды, дәүләт гимннары яңгырады. Аннан соң трибунага Татарстан Рәисе Рөстәм Миңнеханов чакырылды.
Нәкъ бер ел элек, без шушы урында Татарстанда Ватанны саклаучылар елына старт бирдек. Бу безнең ил сагында торучыларга ныклы игътибар чоры буларак та истә калды. Без ул елны тәмамлыйбыз, әмма алар турында кайгыртуыбызны һәм ярдәм чараларын төгәлләмибез. Ватанны саклаучылар – ул кулына корал тоткан кеше генә түгел, ә ил алдындагы изге бурычына, гаиләгә, Ватанга тугрылык саклаучы да.
Республикада Хәрби һәм хезмәт батырлыгы елы бара. Бу карар безнең окопларда гына түгел, ә тылда да – станоклар янында, госпитальләрдә, завод цехларында җиңү яуланганнарга да ихтирамны дәлилли. Татарстан – һәрвакыт хезмәт һәм сугышчан батырлык янәшә торган төбәк булды. Бүген безнең предприятиеләрдә, фәнни лабораторияләрдә һәм гражданлык хезмәтендә шундый ук традиция яши – хезмәтең белән яклау, көндәлек тырышлык аша каһарманлыклар кылу, – дип белдерде ТР Рәисе.
Фото: © «Татар-информ», Владимир Васильев
Тантана дәүләт бүләкләре тапшыру белән дәвам итте.
«Күрергә язмасын»
Ватанпәрвәрлек рухында, Ватан геройларын хөрмәтләп узган зур чарада Татарстан районнарыннан килүчеләр дә бар иде. Актаныш районының хәрби ветераннары район башлыгы, үзе дә әфганчы Ленар Зарипов, социаль яклау бүлеге җитәкчесе Гөлназ Хуҗахмәтова җитәкчелегендә килгәннәр.
Фото: Ленар Зариповның социаль челтәрләрдәге сәхифәсеннән
Ир-атлар күргәннәре турында сөйләргә, искә алырга бик теләмиләр.
Андый сугышларны күрергә язмасын, – дип кенә җавап бирә күпчелек батыр ир-егетләр.
Фото: © «Интертат», Юлай Низаев
Ветераннар арасында Актанышның Яңа Әлем авылыннан Илсур абый Зәкиевны да күреп алдым. Махсус хәрби операциядә позывное «Док» булган. Яраланып туган ягына кайта. Ул Чечнядагы сугыш хәрәкәтләре ветераны да. Махсус хәрби операциядә күп кенә хәрби иптәшләренең гомерләрен саклап кала. «Батырлык өчен» һәм баш төр медальләр иясе.
Шулай ук Актаныштан фотограф Рамил ага Әхмәтов белән күрештек. Рамил абый – Чечня ветераны. Ул да утны-суны кичкән шәхес.
Дошман солдатлары да безнең кебек кешеләр. Тик алар афәт булдырырга килә. Ә без һәрвакыт иминлек өчен көрәшәбез. Бер адым да артка чигенмәскә, газиз халкыбызны тынычлыкта яшәтергә, – ди ул.
Хатын-кызлар җыры
Концерт барышында күзләрне яшьләндергән мизгелләрнең берсе – махсус хәрби операция офицерларының хатыннарын берләштергән «Никто кроме нас» волонтерлык хәрәкәте хоры чыгышы булгандыр, мөгаен. Алар Роберт Рождественский сүзләренә, композитор Евгений Птичкин язган «Довоюй, родной» җырын башкарды. Хор белән Лилия Култышева җитәкчелек итә. Алдарак язып үтелгән Виктория Шиһапова да – хор солисткасы. Билгеләп үтәргә кирәк, хорга яу кырындагы ир-егетләрнең сөйгәннәрен генә түгел, ә әниләрен, сеңелләрен дә чакырып калалар. Бүгенге көндә иҗат коллективы ТР халык артисткасы Миләүшә Таминдарова җитәкчелегендәге Татарстанның Дәүләт Камера хоры базасында репетицияләрен үткәрә, яңадан-яңа җырлар яздыра.
Фото: © «Татар-информ», Владимир Васильев
Ил терәге – ир-егет. Аллаһы Тәгалә сакласын сезне, батырлар!
Фото: © «Татар-информ», Владимир Васильев