Айгөл бала табар алдыннан сабые белән бергә үлгән: «Куркырлык берни юк, дигән иде табиб»

Оренбург өлкәсенең Первомайский бистәсендә яшәүче Айгөл исемле хатын-кыз йөклелегенең соңгы аенда баласы белән бергә вафат булган. Хәле начарланган йөкле хатынны Первомайскийдан Бузулук хастаханәсенә алып бару өчен, «ашыгыч ярдәм» машинасына сәгать ярым вакыт кирәк була. Бу хакта Orenday сайты яза.

Первомайский бистәсендә яшәүче Тюлегеневлар өченче балаларын алып кайтырга җыенган була, аларның 7 яшьлек уллары һәм 6 яшьлек кызлары бар. Өченче уллары ноябрь ахырында туарга тиеш була. Әмма балага исән килеш туу насыйп булмый – хастаханәдән өйгә бала да, аның әнисе 31 яшьлек Айгөл дә кире әйләнеп кайтмый. Яшь әнинең һәм сабыйның гомере Бузулук хастаханәсендә өзелә.

«Хатыным бер вакытта да җитди авырмады, бар кешедәге кебек, гадәти салкын тиюләр, күзләре белән бик җитди булмаган проблема бар иде. Йөклелеге дә тыныч узды, аз гына хәлсезлеге булды. Нәрсә булганын аңлый алмыйбыз, беркем юньләп берни аңлатмый. Бөтен нәрсәне тәфсилләп аңлатучы берәр табибны тыңлыйсы килә, иң мөһиме – хатынымны һәм улымны саклап калу мөмкин булган микән? Кич хатыным үз аякларында үзебезнең бистәдәге хастаханәгә китте, ә берничә сәгатьтән, төн уртасында, Бузулуктагы хастаханәдән шалтыраттылар һәм хатыным белән улымның үлүе турында әйттеләр», – дип сөйләгән Айгөлнең ире Армат.

8 ноябрь иртәсендә Айгөл гинекологка план буенча тикшеренүгә бара, бала табар вакыты да җитеп килә, тиешле анализларны тапшыра. Анда аңа икенче тапкыр 17 ноябрьдә килергә кушалар, Армат сүзләренчә, бернинди куркыныч та булмаган.

«Бу хәлләргә 4 көн кала Айгөл бераз ютәлли башлады, әзрәк температурасы күтәрелде, ул вакытта гаиләбездә барыбыз да – балалар да авырып чыкты, тик барысы да тиз узды. 8 ноябрь кичендә мин төнгә эшкә киттем. 9 ноябрьдә, иртәнге 8ләр тирәсендә хатыным смс-хәбәр язды: саруы кайнаган, күңеле болганган һәм мин кайткан вакытта йоклаган булса, уятмавымны сораган. Айгөл көне буе ял итте, ә кичкә таба температурасы күтәрелде, шулай ук, шул көнне анализлары буенча лейкоцитлары күтәрелгәнен белдек, тик хастаханәгә ятарга тәкъдим итмәделәр. Кичке 6-7 арасында мин төнге сменага эшкә җыена башладым. Шул вакытта хатыным эченең аскы өлеше тартып авыртуга зарлана башлады, эче дә китте. Үзем хатынымны хастаханәгә илтергә өлгерми идем, шуңа күрә абыем Ержаннан сорадым. Китәр алдыннан Айгөл минем белән саубуллашты, һәм шуннан соң мин аны башка исән килеш күрмәдем инде», – сөйләгән ире.

Ержан Айгөлгә ботинкаларын кияргә ярдәм иткән, һәм хатын машинага хәтле тыныч кына бара, хастаханәгә дә әйбәт барып җиткән. Хастаханәгә килеп җиткәч, Айгөл белән табиблар шөгыльләнә башлый.

«Район хастаханәсендә, иң беренче эш итеп, баланың хәлен тикшерделәр. Ул вакытта мин үзем дә кабинет янында идем, баланың йөрәк тибешен ишеттем. Табиб чыккач, «куркырлык нәрсә юк» диде, бәлки, шулай дип тынычландырырга гына теләгәндер. Без Айгөлнең гомере кыл өстендә булганын белмәдек, берәр ризыктан агулангандыр, дип уйладык. Аны Бузулукка юкка гына җибәрмәделәр бит инде. Өлгерер өчен, «ашыгыч ярдәм» машинасы 130-140 км тизлек белән чапты», – дип сөйләгән туганнары Ержан.

«Ашыгыч ярдәм» машинасы йөртүчесе машинаны булдыра алганча куган, тик 115 километр юл, сәгатьтән артык вакыт хатын-кыз һәм карындагы бала өчен алтынга тиң вакыт була. Юлда Айгөлнең хәле начарлана.

«Хатынымны Бузулукка китергәннән соң аны реанимациягә, ә соңыннан операциягә алып кергәннәр, дип сөйләде табиблар, тик мин моны тикшереп карый алмыйм. Баланы алганда, ул инде үлгән була, ә Айгөл кичке 10нардан соң вафат булган. Үлеменең беренчел сәбәбе – эчәклекләрдәге кан тамырлары тромбозы», – дип сөйләгән Армат хатынының соңгы минутларын.

11 ноябрьдә Айгөлне сабые белән бер кабергә иңдерәләр. Хәзер туганнары бу хәлгә ышана алмый. Ничек табиблар бу җитди авыруны күрми калган, бу авыру 1 тәүлек эчендә кеше үтерерлек дәрәҗәдә азды микән, дигән сораулар тынычлык бирми аларга. Чөнки Айгөл үләренә 1 көн кала гына табибка күренгән.

Айгөл белән нәрсә булган, һәм ни сәбәпле аны Бузулукка җибәрәләр, ә урында ук ярдәм күрсәтмиләр? «Orenday» басмасы Первомайский район хастаханәсендә дә бу хакта белешкән. Хастаханәнең баш табибы Вадим Копылов журналистларны кызыксындырган сорауларга җавап бирүне үзенең урынбасарына йөкләгән, шәхсән аралашудан баш тарткан.

«Без бернинди мәгълүмат та бирә алмыйбыз, чөнки бу – табиб сере. Нинди булса мәгълүматны хастаханәдән түгел, ә туганнарыннан ала аласыз. Хатын-кызны Бузулукка сәламәтлек күрсәткечләре буенча алып киттеләр», – дигән ул.

Первомайский районында роддом юк, шуның аркасында табиблар да юк. Әгәр табиблар булса, Айгөлгә ярдәм итә алмаган булсалар да, бәлки, һичьюгы, балага исән калырга ярдәм иткән булырлар иде.

Тикшерү комитетында да бу хәлгә аңлатма бирергә авырсынганнар, туганнары янына да сорау алу өчен беркем дә бармаган. Әмма погонлы кешеләрне район башлыгы янында күргәннәр, дип яза басма.

«Orenday» редакциясе тикшерү органнарыннан һәм Сәламәтлек саклау министрлыгыннан Айгөл Тюлегеневага дәвалауның никадәр сыйфатлы күрсәтелүе турында җавап көтә. Моның өчен рәсми запрослар җибәрелгән. Җавап Айгөлнең туганнарына да килергә тиеш.

Берничә көн элек кенә Первомайский хастаханәсендә тагын бер шау-шулы хәл була. Бу юлы В.И. Войнов исемендәге Оренбург өлкә хастаханәсеннән урологлар чакыртырга туры килә. Табиблар ашыгыч рәвештә бистәгә килә һәм бөере өзелгән, каны күп аккан хатын-кызның гомерен саклап кала. Хирурглар хатын-кызның бөерен һәм корсак куышлыгындагы гематомасын ала. Операция уңышлы уза, бәхеткә, пациентканың гомерен саклап калалар.