Өйләрне, юлларны су баса, авыл көтүе капкынга эләккән: «Сыерлар су эчендә, ач, савылмый»
Якутиядә су басулар давам итә. Оймякон районында йортларны һәм юлларны су баскан, дистәләрчә кеше эвакуацияләнгән. Усть-Алдан улусындагы Хара-Тумул авылында бөтен авыл терлеген су афәтенә эләккән. Бу турыда «Комсомольская правда» яза.
Яңгырлардан соң су кинәт күтәрелгән. 500дән артык сыер су белән уратып алынган кечкенә генә калкулыкта калырга мәҗбүр булган. Коры урын юк, азык беткән, савып булмый. Кешеләр үзләре көч-хәл белән коры җиргә киткән, хәзер ничек тә булса малларны коткарырга тырыша.
— Сыерлар суда күкрәккә кадәр басып тора. Хәрәкәтләнмиләр диярлек. Суык, ашарга юк. Бөтен печәнне су алып киткән яки ул чери башлаган, — ди авыл кешесе. — Кем көймә белән, кем су ерып, азыкны капчыклап ташый. Ә кемнең транспорты юк — алар бөтенләй ярдәмсез.
Терлекләр чын мәгънәсендә исән калу өчен көрәшә. Авыл халкы дежурлык оештырган, кул белән эшлиләр — печәнне аркаларында күтәреп ташыйлар, суны чиләктә күтәреп чыгаралар, ни бар – шуны ашаталар. Ләкин бу җитми. Күпләр өчен сыер — гаиләнең бердәнбер керем һәм туклану чыганагы: сөте, ите, тиресе — барысы да кирәк. Бер сыерны югалту — бөтен гаилә өчен зур югалту, дип яза «КП» хәбәрчесе.
Суык суда торган терлекләр авырырга да мөмкин. Коры урын һәм тиешле туклану булмаса, аларның иммунитеты какшый, ялкынсынулар, суык тиюләр, мастит кебек чирләр ихтимал. Ә ветеринар ярдәменә килү мөмкин түгел — су баскан урынга юллар ябык.
— Без түзәргә тырышабыз, ләкин су кимемәсә, печән китермәсәләр — маллар үлә башлаячак. Бу – фаҗига. Без монда шушы сыерлар хисабына гына яшибез, — дип уртаклаша Хара-Тумул фермеры.
Якутиядә ташулар еш була, әмма Усть-Алдан улусында болай тиз су күтәрелүне хәтерләмиләр. Бер төн эчендә елга суы бер метрга күтәрелгән. Су абзарларга кергән, печәнне каплаган, терлекләрне калкулыкка качарга мәҗбүр иткән. Кешеләр документларны, балаларны коткарган арада, сыерлар үзләре генә калган.
Барлык кыенлыкларга карамастан, авыл халкы бирешми. Алар көн саен терлекләрне ашатып тора, өшүдән саклый, ярдәм сорап дәшә. Авыл хакимиятендә бу хәл контролдә, азык китерү һәм бер өлеш малларны эвакуацияләү мөмкинлеге карала, ди.