Һәлакәттә гаепләнүче «ашыгыч ярдәм» машинасы шоферы: «Кеше гомерен коткарырга бара идек»

Чаллыда «ашыгыч ярдәм» машинасы катнашында килеп чыккан юл-транспорт һәлакәте турындагы резонанслы җинаять эше буенча суд процессы турында «Челнинские известия» газетасы яза. Әлеге фаҗигадә «ашыгыч ярдәм» машинасы йөртүчесе Илдар Дәүләтшин гаепләнә.

Бәрелүдән «ашыгыч ярдәм» машинасы янга ава

Юл-транспорт һәлакәте быел 6 февральдә кичке 20.43 сәгатьтә Вахитов һәм Сөембикә проспектлары киселешендә була. «Ашыгыч ярдәм» машинасы «Ауди А8» машинасы белән бәрелешә. Бәрелештән соң «ашыгыч ярдәм» машинасы икенче полосаны аерып торучы каймага, светофор һәм металл коймага барып менә һәм уң ягына ава. «Ашыгыч ярдәм» машинасы һәм иномарка йөртүчеләре, медицина хезмәткәрләре зыян күрә.

Һәлакәттә фельдшер Илдар Заһидуллинга бигрәк тә каты эләгә. Бәрелештән соң ул тәрәзәдән очып чыга, һәм аның өстенә машина ава.

«Машинаны күтәргәч, аның астында кеше ятканын күреп алдык. Аны тимер өеме сытмавы – чын могҗиза. Ир-ат канга баткан, авыр сулый һәм ыңгыраша иде. Тышкы билгеләре буенча ул шок хәлендә иде», – дип сөйләде шаһитлар. Ул 2 көн ашыгыч медицина ярдәме хастаханәсендә реанимациядә ята. Соңыннан аны республика клиник хастаханәсенә күчерәләр. Хәзер фельдшер стационарда дәвалана.

Фельдшер Алина Шилкова да әлеге һәлакәттә җитди яралана.

«Төнге сәгать 1дә реанимациядә аңыма килдем. Бил, оча сөяге турысыннан умыртка баганам бик авыртты. Бөтенләй селкенә алмый идем: әзрәк күтәрелә дә, борыла да алмыйм. Мине ничек салган булсалар, шулай яттым. Соңрак табиб умрау сөягемнең теткәләнеп беткәнен һәм бик каты имгәнүем турында әйтте. Аннан 2 сәгать буе операция ясап, аягыма пластина куйдылар», – дип сөйләде ул.

«Ашыгыч чакыруга бара идек»

Алина Шилкова сүзләренә караганда, һәлакәткә очраганчы, әлеге «ашыгыч ярдәм» бригадасы экстерн чакыру алган.

«48нче комплекстан чакыру алдык. Кешегә сулыш алу авыр булган, күкрәк турысы авырткан, ягъни бу – йөрәк өянәге, инфаркт булырга мөмкин иде», – дип аңлатты ул.

Мондый очракларда бригаданың беренче бурычы: кешене тиз арада медицина учреждениесенә китерү. Регламент буенча шалтырату кабул ителгәннән алып авыруны табиблар кулына тапшырганчы 1 сәгатьтән артык вакыт үтәргә тиеш түгел.

«Без кеше гомерен коткарырга дип бара идек. Үземне берничек тә гаеплеләр рәтендә булырмын дип күз алдыма китермәдем», – диде судта Илдар Дәүләтшин.

«Ул җилбәзәк түгел!»

Тикшерү версиясе буенча, юл-транспорт һәлакәтендә «ашыгыч ярдәм» машинасы йөртүчесе гаепле.

Утырышта гаепләү нәтиҗәсе игълан ителгәндә, шәһәр прокуроры ярдәмчесе Аяз Ризванов машина йөртүченең, ялтыравыклы маяклар белән йөрүче «ашыгыч ярдәм» машинасы белән идарә иткәндә, юл йөрү кагыйдәләрен бозып, махсус тавыш сигналын кушмыйча, светофорның тыю сигналына хәрәкәт иткәнен ассызыклады. Машина йөртүче юл хәрәкәтенең башка катнашучыларының үзенә юл бирәчәкләренә инанып тормаган. Машинадагы пассажирлар куркынычсызлык каешларын эләктермәгән булган.

Илдар Дәүләтшин юл йөрү кагыйдәләрен бозып, саксызлык аркасында кеше сәламәтлегенә җитди зыян китерүдә гаепләнә. Хөкем карарын игълан иткәндә «җилбәзәк» сүзе яңгырады.

Иренә судта ярдәм итәргә килгән Регина мондый характеристика белән килешмәде.

«Без 17 ел бергә, 2 балабыз бар. Илдарны берничек тә гамьсез, җилбәзәк кеше дип атап булмый. Ул – бик җаваплы кеше. Берәр эшкә алына икән, ул аны җиренә җиткереп, сыйфатлы итеп башкарырга тырыша. Аның әйләнә-тирәдәгеләргә файдалы буласы килгәнгә эшкә дә «ашыгыч ярдәм»гә китте», – диде Илдарның хатыны, журналистлар белән сөйләшкәндә.

Дәүләтшинның хезмәттәшләре дә аның турында бары тик яхшы итеп кенә сөйлиләр.

«Машина йөртүченең эш стажы да зур – 18 елга якын. Ул шәһәрне яхшы белә. Һәрвакытта да бик әйбәт йөртә иде», – диләр алар.

Илдар Дәүләтшин судта үз гаебен өлешчә таныды. Һәлакәт вакытында тавыш сигналын кушмаганны таный.

«Машинаның сигнализациясе өзелеп торып эшли. Бертуктаусыз эшләп тора торганы юк. Тавыш 20 секунд бара, аннан туктап ала. Кабаттан эшләп китсен өчен, аны машина йөртүче кабызырга тиеш. Шул сигналны кабызырга тиешле вакытта мин юл киселешендәге вазгыятьне күзләдем», – ди машина йөртүче.

«Каймага барып төртелдем»

Дәүләтшин сүзләренә караганда, ул 3 рәттәге машиналарның туктаганын күргән.

«Ауди» иң кырыйдагы, борылыш ясый торган полосада була. Әлеге рәттән туры китеп булмый, чөнки ул полосаларны аерып торучы каймага килеп төртелә, дип белдерә Дәүләтшин. Проспект реконструкциясе вакытында әлеге конструкторлык эше юл куркынычсызлыгын арттыру максатларыннан чыгып эшләнә. Шулай булуга да карамастан, чит ил машинасы йөртүчесе, проектировщиклар куйган киртәне әйләнеп үтеп, «ашыгыч ярдәм» машинасына килеп бәрелә. Барысының да бер мизгел эчендә килеп чыгуын «тизлек арттыру нәтиҗәсендә туган» дип аңлата Дәүләтшин.

«Ауди» машинасының йөртүчесе – Love Radio алып баручысы, Secret Room рестораны идарәчесе Александр Белоусов. Аның машина йөртү таныклыгы һәм ОСАГО полисы булмаган. Әлеге эш буенча ул шаһит буларак үтә.

Тикшерү версиясе буенча, «Ауди» машинасы йөртүчесе рөхсәт ителгән тизлек белән барган. «Ашыгыч ярдәм» машинасының тизлеге исә 44 км/сәгать булган.

Алдан булган тикшерү барышында Дәүләтшин бәрелешүдән качуның техник мөмкинлеген исәпләү өчен, видеотехник һәм автотехник экспертизаларны кабат үткәрү турындагы үтенеч белән чыга. Аны кире кагалар һәм аның бу гамәлләрен, тикшерүне озакка сузарга тырышуы, дип тә бәялиләр.

Дәүләтшин үзе эксперимент үткәрә һәм аны видеога төшерә. Ул шунда «Ауди» машинасы башкарган маневрны, юл йөрү кагыйдәләрен бозмыйча эшләп булмавына инана.

Гаепләнүче сүзләренә караганда, «Ауди» машинасы йөртүчесенең машина йөртү таныклыгы булмавы судта бөтенләй каралмаган. Аңа чит ил машинасы йөртүчесенең таныклыгы булмавын «тикшерү предметы түгел» дип хәбәр итәләр.

«Кеше машина йөртү таныклыгы да булмыйча руль артына утыра. Моның эшкә бер катнашы да юк, имеш! Ә минемчә, бар. Ул кичтә егет я җәяү атларга, я җәмәгать транспортына утырырга тиеш иде. Шул вакытта бу мәшхәр дә булмас иде», – дип Регина Дәүләтшина гаделсезлеккә ачулана.

Утырышта Илдар Дәүләтшин, стационар дәвалануда булган фельдшер Илдар Заһидуллиннан башка, барлык шаһитларны һәм зыян күрүчеләрне дә судка чакыруны таләп итте.

«Әлеге егеткә үзенең «Ауди» машинасын биргән кызның да судка килүен телим. Минем аңардан сорыйсым килә: аның машина йөртү таныклыгы булмавын белдеме икән ул?» – дип аңлатты Дәүләтшин.

Суд, гаепләнүченең әлеге фаҗига фигурантларыннан сорау алу кирәклеге турындагы гаризасын исәпкә алып, бу эшне карауны 24 июльгә кадәр кичектереп тора.