«Өч баласы ятим калды»: Татарстанда яшәүче 33 яшьлек хатын бала тапканда үлгән

Радик һәм Дилә Фәтхуллиннар 15 ноябрьдә никахларын рәсмиләштерә. Шушы көннәрдә гаиләдә игезәк балалар туарга тиеш була. Диләнең ун яшьлек улы Әмирхан үсеп килә. Ләкин 22 ноябрьдә бала тапканда, Дилә вафат була. Бу турыда «Комсомольская правда» сайты язды.

Гаилә дуслары инстаграмда язганча, Дилә баласын Казанда табарга тиеш була. Ләкин хатынның тулгагы башлангач та, аны Биектауда калдыралар. Дилә беренче кызын үзе тудыра. Икенче кызны исә кесарев кисеме ясап таптыралар. Ире сүзләренчә, аналык сулары канга эләгә һәм кан агулану башлана. Яшь ананың йөрәге белән проблемалары булмый.

Табиблар булдыра алганны эшләсә дә, Диләне коткара алмый. Дилә комага китә һәм 22 ноябрьдә иртәнге дүрттә үлә. Мәрхүмәгә 33 яшь кенә була. Аның ире Радик исә ун яшьлек Әмирхан, игезәк кыз балалар белән ялгызы гына кала.

Гаилә дуслары әнисез калган балалар белән әти кеше өчен ярдәм җыя башлый. Нарасыйларга кием-салымны Дилә алдан алып куйган. Хәзергә балалар Балалар республика клиник хастаханәсендә табиблар күзәтүендә торып тора.

«Иң зур борчу — гаиләнең үз йорты юк. Алар фатир арендалап яши. Диләнең әти-әнисе дә юк, бертуганы Ләйсән генә бар. Радикның исә әтисе исән. Сезнең ярдәм бик кирәк», диелә инстаграмдагы хәбәрдә.

«Комсомолка» сайты хәбәрчесе мәрхүмәнең туганы Ләйсән белән элемтәгә кергән. Ләйсән Дилә турында, аның ятимә калган балалары һәм тол калган ире турында сөйли. Игезәкләрнең беренчесе 21 ноябрьдә 7.30 сәгатьтә, икенчесе 64 минут узгач туа.

25 ноябрьдә Радик балаларына туу турында таныклык рәсмиләштерә. Ул кызларга Асыльяр һәм Айзилә дип исем биргән. Дилә дә кызларына шундый исем кушарга теләгән булган. Радик туу турында таныклар белән фотосын социаль челтәргә куйды. Ул ярдәм итүчеләргә рәхмәт әйтә. Бу турыда Радик инстаграмдагы сәхифәсенә язды.

«Бүген сабыйларга туу турында таныклык алдым. Минем кояшым белән планлаштырган исемнәрне куштык. Ярдәм иткән барыгызга да рәхмәт», — дип яза ул.

Җырчы Фирдүс Тямаев та бу гаилә турында инстаграмда пост куйды. «Дуслар, мин бу хәлне күргәч, йөрәкләрем өзелеп төште дип торам. Дуслар, ярдәм итик, зинһар. Үтенеп сорыйм. Әнисез балалар үстерү. Я Раббым, зинһар ярдәм ит. Алдан ук рәхмәт яусын сезгә», — дип яза Тямаев.

Россия Тикшерү комитетының Татарстан буенча Тикшерү идарәсе Дилә Фәтхуллина үлеме буенча тикшерү эшләре башлаган.

«22 ноябрьдә Республика клиник хастаханәсенең реанимация бүлегендә 33 яшьлек хатын вафат булды. Россия Тикшерү комитетының Татарстан буенча тикшерү органнары тикшерү башлады. Вакыйганың барышын ачыклауга юнәлтелгән чаралар күрелә. Тиешле экспертизалар билгеләнәчәк. Процессуаль тикшерү кысаларында хатын-кыз үлеме һәм табибларның гамәлләре арасында сәбәп-нәтиҗә бәйләнешләре ачыкланачак. Тикшерү нәтиҗәсе буенча процессуаль карар кабул ителәчәк», диелә ведомство хәбәрендә.